İyulun 11-12-də Vilnüsdə keçiriləcək NATO sammiti zamanı Litvada pilotsuz təyyarələr və kommersiya uçuşları qadağan edilib.

Turaztv.az AZƏRTAC-a istinadən xəbər verir ki, bu barədə Aerokosmik Məlumat Mərkəzinin direktoru İqnas Daeula istinadən “Bernardinai” nəşri məlumat yayıb.

“Biz dronların məsuliyyətli və qanuni istifadəsini başa düşürük. Bu yüksək səviyyəli sammit zamanı görülən zəruri ehtiyat tədbirlərini tam dəstəkləyirik. Dronların uçuşlarına qoyulan qadağa sammitin keçiriləcəyi yerlər haqqında casus məlumatlarının toplanması təhlükəsi ilə bağlıdır”, - deyə məlumatda bildirilib.

Həmçinin qeyd olunub ki, iki gün davam edəcək sammit zamanı Vilnüs Beynəlxalq Hava Limanı kommersiya uçuşları üçün bağlanacaq.

NATO-nun Vilnüs sammitinin əsas mövzularından biri Ukraynaya yardım paketlərinin genişləndirilməsi olacaq. Gözlənilir ki, görüş zamanı müttəfiq ölkələr Ukrayna ordusunun modernləşdirilməsi, onun alyans standartlarına çatdırılması üzrə uzunmüddətli çoxillik proqramı razılaşdıracaqlar. Sammit çərçivəsində Ukrayna-NATO şurasının yaradılması da gözlənilir.