“Qarabağ”ın baş məşqçisi Qurban Qurbanov geridə qoymaqda olduğumuz 2022-ci ili dəyərləndirib.

Turaztv.az Fanat.Az -a istinadən xəbər verir ki, təcrübəli mütəxəssis Gənclər və İdman Nazirliyinin təşkil etdiyi “İlin idman yekunları” qala mərasimində jurnalistlərə açıqlamasında bunları söyləyib:

“2022-ci ili idman ili adlandırmaq olar. Bütün növlərdə çox yaxşı nəticələr qazanıldı. Futbola gəldikdə, bəlkə də Azərbaycanda "idmanın şahı"nın ən yaddaqalan ili oldu. "Qarabağ" olaraq, Çempionlar Liqasının təsnifat mərhələsindəki bütün oyunlarımız çox gərgin və maraqlı alındı. Avropa Liqasının pley-off mərhələsinə düşmək üçün son anadək şansımız var idi. Bütün matçlarda ajiotaj oldu. Azarkeşlər təkcə stadionda deyil, bildiyim qədərilə, kinoteatrlarda, küçələrdə, monitorlarda bizim oyunlarımızı izləyirdilər. Bu, mənə çox xoş təsir bağışladı. Bu il həm çempionluğu, həm ölkə kubokunu qazanmaq, həm də minimum Avropa Liqasının qrupuna düşmək bizim üçün yaxşı nailiyyət oldu. Təcrübəmiz daha da çoxaldı. Yadda qalan il oldu".

Qurbanovun sözlərinə görə, son günlər Kadi Borges və Marko Veşoviçlə bağlı xəbərlərin yayılmasında səbəbkar özüdür: "İstədim ki, səmimi olum. Bunlar 2 günün xəbəri deyil. İlboyu danışıqlar, təkliflər olur. Sadəcə, danışıqların hansı mərhələyə gəlib çatdığı bilinmir. Əcnəbi klubların Kadi Borges və Marko Veşoviçlə maraqlandıqlarını demişəm. Bəzən bir futbolçu ilə müqavilə bağladıqda, oraya oyunçunun özü və ya agenti tərəfindən hansısa bənd qoyulur ki, bu da müəyyən səlahiyyətləri klubun əlindən alır. Belədə gedən futbolçunun qarşısını ala bilmirik. Hər bir halda yenə də ümumi danışıqlarımız gedir”.

Təcrübəli baş məşqçisi braziliyalı yarımmüdafiəçiyə uzun müddətdir maraq olduğunu vurğulayıb: "Təkcə "Krasnodar" yox, başqa bir neçə ölkənin klubu onu diqqət mərkəzində saxlayırdı. Bunlar normal haldır. Ötən yay Kvabena Ovusu və Leandro Andrade ilə də maraqlanmışdılar. Bizim özümüz də bəyəndiyimiz futbolçuların klubları ilə əlaqə saxlayır, danışıqlar aparırıq. Normal prosesdir. Sadəcə, bu, nə dərəcədə bizim xeyrimizə olacaq, qarşıdakı günlərdə və ya aylarda bilinəcək”.

Qurbanov özünə də bəzi təkliflərin gəldiyini gizlətməyib: “Futbolçularla maraqlandıqları kimi, mənə də agentlər tərəfindən çıxışlar olur. Müəyyən təkliflər irəli sürürlər. Amma mən "Qarabağ"a bağlı insanam”.

50 yaşlı mütəxəssis heyəti gücləndirməklə bağlı planlarından da bəhs edib: “Bəzən transfer məsələləri düşündüyümüz kimi alınmır. İstənilən halda, yenə də işimizi davam etdirəcəyik. Danışıqlar apardığımız bir neçə futbolçu var. İki və ya üç oyunçu transfer etmək istəyirik”.