ŞƏMSİYƏ KƏRİMOVA : Səni çox sevirik və çox darıxırıq...

Xəbərlər

6.06.2026, 01:05

ŞƏMSİYƏ KƏRİMOVA : Səni çox sevirik və çox darıxırıq... - FOTO

Bu gün sənin cənnətdəki 5-ci doğum günündür, əziz Anam...

Sənsiz keçən illər öyrətdi ki, insan bəzi yoxluqlara alışsa da, ana yoxluğuna heç vaxt alışa bilmir. Evimiz əvvəlki evdir, insanlar əvvəlki insanlardır, amma sənin yoxluğun hər küncdə hiss olunur. Çünki ana evin istiliyi, ailənin dayağı, övladın ən böyük təsəllisidir.

Bu gün yenə görüşünə gəldim. Məzarının üstünə təzə, tər çiçəklər düzdüm. Səninlə dərdləşdim, ürəyimdə yığılan sözləri bir-bir söylədim. Əvvəllər hər dərdimə cavab tapırdım səndə. Bu gün isə susqunluğunla dinlədin məni. Cavab ala bilməsəm də, bilirəm ki, ruhun yanımdadır, duaların hələ də bizimlədir.
Qara mərmərdən baxan şəklin mənə gülümsəyirdi. O təbəssümdə illərin şəfqəti, sevgisi, mərhəməti vardı. Bir anlıq elə bildim ki, yenə saçımı oxşayacaqsan, yenə “narahat olma, hər şey yaxşı olacaq” deyəcəksən. Amma zaman bizi ayıran sərhədi dəyişmir...
Ana, sən bizim başımızın tacı, evimizin yaraşığı idin. Sən gedəndən sonra anladıq ki, anasız evlərin işığı da solğun olur, istiliyi də az olur. Hər sevincli günümüzdə səni axtarırıq, hər çətin anımızda sənin məsləhətinə ehtiyac duyuruq.
Bu gün doğum günündür. Sənə nə hədiyyə verə bilirəm, nə də əllərindən öpə bilirəm. Yalnız dualarımı, həsrətimi və sonsuz sevgimi göndərə bilirəm.
Ruhun şad olsun, əziz anam. Cənnətdəki doğum günün mübarək. Bil ki, səni sevən ürəklərdə yaşayırsan və nə qədər ömür var, həsrətin də, sevgin də bizimlə olacaq.Səni çox sevirik və çox darıxırıq...
Allah rəhmət eləsin. Məkanın cənnət olsun.
05.06. 2026