Limonlu su adətən orqanizm üçün ən faydalı içkilər sırasında qeyd edilir, lakin bu, onu heç bir məhdudiyyət olmadan içə biləcəyimiz demək deyil. AZƏRTAC “MedikForum”a istinadla xəbər verir ki, diyetoloq Mariyat Muxina belə hesab edir. Mütəxəssis limonlu suyun fayda və zərərlərindən danışıb. İçkinin potensial olaraq zərərli keyfiyyətlərini qeyd edərək, Muxina onun zəif, həssas və ya zədələnmiş diş minası üçün çox aqressiv ola biləcəyini qeyd edib.

“Limonlu su diş minasını zədələyə bilər. Dişlərin onun turşu mühitinə məruz qalmaması üçün içkinin qəbulundan sonra ağız boşluğunu təmiz su ilə yaxalamaq lazımdır”, - deyə o bildirib.

Həmçinin Muxina, limonlu suyun həzm sisteminin selikli qişasını lazımsız şəkildə stimullaşdırmaq qabiliyyətinə də diqqət çəkib.

"İnsanda turşuluğun artması fonunda hiperasid qastrit, mədə xorası varsa, limonlu su kəskinləşməyə səbəb ola bilər", - deyə diyetoloq xəbərdarlıq edib.

Limonlu su içməyin faydalı təsirlərini şərh edən Muxina dəqiqləşdirib ki, bunun sayəsində böyrəklərdə daş əmələ gəlməsi riski azalır, oksalatların miqdarı azalır və kalsium mübadiləsi yaxşılaşır. Əgər əks göstərişlər yoxdursa, o zaman bir stəkana təxminən iki xörək qaşığı limon şirəsi əlavə etməklə suyu içmək olar - "bu doza C vitamininin gündəlik normasının 20 faizi və kiçik dozada B vitamini, kalium, fol turşusunu ehtiva edir".