İtaliyanın Baş naziri Ciorcia Meloni şənbə günü ABŞ Prezidenti Donald Trampın yeni tənqidlərinə cavab verib. O, Amerika liderinin İtaliya hökuməti başçısının populyarlığı və rəsmi Romanın İranla əlaqəli ABŞ-nin hərbi əməliyyatları ilə bağlı mövqeyi barədə fikirlərini rədd edib.

AZƏRTAC xarici mediaya istinadla xəbər verir ki, Meloni “Instagram” sosial şəbəkəsindəki paylaşımında vurğulayıb: “Prezident Tramp, bu davamlı, təxribat xarakterli hücumlar mənasızdır. Mənim populyarlığım İtaliyanın milli maraqlarını müdafiə etmək qabiliyyətimdən asılıdır və mən həmişə məhz bunu etmişəm”.

Meloni, həmçinin Trampın İtaliyadakı ABŞ hərbi obyektlərinə qarşı tənqidlərinə cavab olaraq bildirib ki, onların istifadəsi ikitərəfli müqavilələrlə tənzimlənir. O qeyd edib: “Onların istifadəsi həmişə hörmət etdiyimiz və mən Baş nazir olduğum müddətcə pozula bilməyəcək müqavilələrlə tənzimlənir.

İtaliyanın suveren dövlət olduğunu xatırladan Baş nazir əlavə edib: “Hər halda, mənim populyarlığım sizi narahat etməsin. Mən sizə öz populyarlığınıza diqqət yetirməyi məsləhət görürəm”.

Bu fikir mübadiləsi Trampın “Truth Social”da paylaşdığı şərhlərdən sonra baş verib. Həmin şərhlərdə o, Meloninin Fransada keçirilən G7 sammiti zamanı dəfələrlə onunla şəkil çəkdirmək istədiyini iddia edib və onu İranın nüvə silahı əldə etməsinin qarşısını almaq səyləri ilə bağlı ABŞ-nin tələblərini rədd etməkdə günahlandırıb.

Tramp, həmçinin İtaliyanı ABŞ-nin bu ölkədəki bazada uçuş-enmə zolaqlarından istifadə etməsinə icazə vermədiyinə görə tənqid edib, bunu “böyük logistika narahatlığı” adlandırıb. O, Vaşinqtonun NATO vasitəsilə İtaliyanın təhlükəsizliyinə böyük töhfə verdiyini vurğulayıb.

ABŞ Prezidenti daha sonra iddia edib ki, Meloni ABŞ-nin “İranı hərbi cəhətdən məğlub etməsindən” sonra onunla əlaqələri bərpa etməyə çalışıb və o, bu iddianı onun daxili siyasi mövqeyi ilə əlaqələndirib.