Bela Zəngibasarlının şeirlər xəzinəsindən

Xəbərlər

15.06.2026, 16:40

Bela Zəngibasarlının şeirlər xəzinəsindən - FOTO

GÜLMƏYƏCƏKLƏR

Nankordan etibar, sədaqət umma,
Satqının, yaltağın yanında durma.
Özünü incitmə, özünü yorma,
Onsuz da qədrini bilməyəcəklər!

Qədirbilməz üçün vermə canını,
Çünki donduracaq isti qanını.
Gözünün yaşının axan anını,
Gülərək seyr edib, silməyəcəklər!

Hər şeyi yüz ölçüb, bir dəfə biçin,
Yaxşını yamandan ayırın, seçin.
Yıxıldığın anda qaldırmaq üçün,
Namərdlər yaxına gəlməyəcəklər!

Ruzidir ağacın meyvəsi, barı,
Zəhmətlə çiçəkdən bal çəkir arı.
Acgözün olsa da dövləti-varı,
Kasıbla, yoxsulla bölməyəcəklər!

Əlində duz yoxsa, öldürmə özün,
Tikantək batacaq ,,can" desən sözün.
Sevincdən yaşarıb, dolanda gözün,
Vallah yasa batıb, gülməyəcəklər!
04.06.2026

SALAMIN ÇATDIRIN ZƏNGİBASARA

Ay Günəş, səhərlər boylan üfüqdən,
Bax, o qəriblikdə, qalan diyara.
Pıçılda yurdumun ,,qulaqlarına",
Soruş, insanların gediblər hara?

Ulduzlar, göz vurun doğma ellərə,
Bir baxın, orada varmı bahar-yaz?
Görün əvvəlkitək hər bir küçədə,
Görünür toy-düyün, çalır kaman-saz?

Həsrətli buludlar, yağdır yağışın,
İslansın elimin torpağı, daşı.
Vətən bir üzüksə, yağılar bilsin,
Bizik o üzüyün qiymətli qaşı.

Doğan Ay, göylərdən nəzarət eylə,
Səmada uçanlar qartalmı, sarmı?
İlk gün bədirlənib doğduğun zaman,
Üzünə salavat çəkənin varmı?

Bulud, Ulduz, Ay və, bir də sən Günəş,
Ürək sözlərimi yetirin ora!
Vətənhəsrətlisi, bu şair qızın,
Salamın çatdırın, Zəngibasara!
25.04.2026.

BORCLUYAM

Qədirbilən xəlbirimdən ələnməz,
Yaxşı insan ürəyimdən silinməz!
,,Dost"sözüdür hecalara bölünməz,
Ələyimdə qalanlara borcluyam.

Söyləmişəm hər an sözün düzünü,
Namərdlərin ələmişəm yüzünü.
Acı olan həqiqətin üzünü,
Şirin olan yalanlara borcluyam.

Allah, yağdır yağışını, dolunu,
İslat bir az ağacını, kolunu.
Az da olsa yaxşıların yolunu,
Ürəyimə salanlara borcluyam.

Çəkən varsa gözəllərin nazını,
Sevən varsa baharını, yazını.
Ruhu ilə kamanını,sazını,
Dilləndirib, çalanlara borcluyam.

Gəlməsinlər min bir hiylə, kələklə,
Danışsınlar xoş arzuyla, diləklə.
Qohum, qardaş- kim olursa, ürəklə,
Salamımı alanlara borcluyam.

Yaxşılıqlar yaddaşlarda kaş qala,
Unutmayan xatirinə bir sala.
Bela deyir, dərin-dərin xəyala,
Kövrələrək dalanlara borcluyam.
BELA ZINGİBASARLI
28.05. 2026 Yığcam