MƏMMƏD QƏDİR : Qocalar evinə atmayın məni

Xəbərlər

4.05.2026, 00:00

MƏMMƏD QƏDİR : Qocalar evinə atmayın məni - FOTO

Ev, eşik qurmuşam yarım canımla,
Övladlar böyütdüm qızıl qanımla,
Baş-başa qalmışam son zamanımla,
Ucuz niyyətlərə satmayın məni,
Qocalar evinə atmayın məni.

Aza qane olub çoxa çatmadım,
Gündüzlər işlədim, gecə yatmadım,
Ən ağır gündə də Sizi atmadım,
Kimsəsiz kəslərə qatmayın məni,
Qocalar evinə atmayın məni.

Salın, gözdən salın nəzərdən atın,
Artığam, daş qoyub Xəzərdən atın,
Göynəyən vicdana bir hüzur qatın,
Düşməsin tellərə peşmanlıq dəni,
Qocalar evinə atmayın məni.

İyrəndirir sizi bəlkə bu görkəm,
Yediyim zəhərdi, zəqqumdu tikəm,
Yük daşıyan canım, artıq bir yükəm,
Allah da götürməz heç mən çəkəni,
Qocalar evinə atmayın məni.

Onsuz da qocalıq məşəqqət, zülüm,
Sönüb həyat eşqim, sovrulub külüm,
Qoy köhnə daxmamın küncündə ölüm,
Öz evimdə geyim bəyaz kəfəni,
Qocalar evinə atmayın məni.

Məngənə fikirlər qəlbimi sıxır,
Duyğular gözümdən sel kimi axır,
Bu evdən hər gecə bir tabut çıxır,
Yadlar yola salır ölüb keçəni,
Qocalar evinə atmayın məni.

Min dəfə çiynimə götürdüklərim,
Bir dəm ciyninizə götürün, gedim.
Ay mənim dünyaya gərirdiklərim,
Haqqın dünyasına ötürün gedim,
Ruhum alqışlasın bu xoş səhnəni,
Qocalar evinə atmayın məni.

Məmməddən nə qaldı, sonuma ərdim,
Bir yaşlı gözlərim, bir quru dərdim,
Vallah, məndən olsa çoxdan ölərdim,
Məhkumam yaşayam Allah verəni,
Qocalar evinə atmayın məni,
Qocalar evinə atmayın məni...