Xəbərlər
16.02.2026, 22:22
Lilpar Cəmşidqızı : QƏSİDƏ
Gözüm səmadə qalıb, *afitabı gözləyirəm.
Şikayət eyləmirəm, bəlkə bir günahım olub,
Sualı dəftərə yazdım, cəvabı gözləyirəm.
Mələklərim dayanıb, sağ və sol tərəfdə, fəqət,
Əlində var qələm, ancaq səvabı gözləyirəm.
Damarda eşqi- Xuda dövr edir mənim nə gözəl,
Suyum çəkilmədi candan, şərabı gözləyirəm.
Gülün də şəbnəmi köksündə qalmayır, tökülür,
Axır, gözümdədi zəmzəm, çün *abı gözləyirəm.
Əsən külək məni qorxutmayır, deyim, biləsən,
Səfər günüm gəlib artıq, *turabı gözləyirəm.
Gəlib qürub çağı, zülmət cahanda tor görünür,
Çəkilmirəm göyə yerdən, gülabı gözləyirəm.
Günəş də çöhrəmə baxmır, qaralmışam deyəsən,
Çatılmasın qaşın, afət, *niqabı gözləyirəm.
Təfəkkürüm məni aldatmayıb, hədər gedirəm,
Bu can döyüşdədi, Yar, inqilabı gözləyirəm.
Ağıl- kəmalımı başdan yox etmisən, Yaradan,
Gəlib- gedəndə mən ancaq *sərabı gözləyirəm.
Adım yazılmayacaq, daş- kəsək tapım, gətirim,
Yazanda ismimi hərdən, xitabı gözləyirəm.
Görəndə yarı pərişandı gözlərim kor olur,
Axanda "sel" bəbəyimdən o *xabı gözləyirəm.
Yorulmuşam elə bil, taqətim tükənsə yenə,
Göyün zatında olan Ali *tabı gözləyirəm.
Nə qədri dözsə də qəlbimdə can, həyat qısadır,
Alıb ədaləti közdən əzabı gözləyirəm.
Veribdi bar- bərəkət çünki əziyyət çəkirəm,
Təlatüməm çoxalan, yerdə *Rabı gözləyirəm.
Bu gün sözündə a, Lilpar, giley-güzar elədin,
Nədən demir qara gözlər, Cənabı gözləyirəm?
*Afitab- günəş işığı
*Ab- su
*Turab- qəbir
*Niqab- pərdə
*Sərab- xəyal
*Xab- yuxu
*Tab- güc, qüvvət
*Rab- ruzi verən
QƏZƏL
Yar, könül bağinə hərdən güli- rənadı gələn,
Sevdiyin- çöhrəsi nəm, gözləri şəhladı gələn.
Zülfünün hər teli köksündə durub, danələnir,
Ay üzün nuruna qəmdən *şəbi- yeldadı gələn.
Eşqdir tabe edən ruhunu səhra gülünün,
Gəzmə Məcnunə dönüb, xanənə Leyladı gələn.
Qönçədən busəni ahəstə küləkdir qoparan,
Gülşənin ruyinə şəbnəm, *meyi- səhbadı gələn.
Bir bəla eşqinə can verdiyi üqbayə, Xuda,
Cənnətin ətri Məhəmməd qızı Zəhradı gələn.
Eşqə düşmüş ürəyin çırpınır, ahəstə yanır,
Söndürən qəlbini vüslət dəmi, dəryadı gələn.
Gizlənən sevgidi mazidə olan xatirələr,
Əks olan ayinədən, hər gecə xülyadı gələn.
Gül açan arzuların mənbəyi qəlbin özüdür,
Göz yaşından sulanan kirpiyə röyadı gələn.
Oldu aləmdə bu gün çox qəzəlin mayəsi eşq,
Yazdığın kəlməyə, Lilpar, sözə mənadı gələn.
*Şəbi- yelda- ən uzun gecə
*Meyi- səhba- qırmızı mey
Son xəbərlər
Ən çox oxunanlar
- Bu gün
- Bu həftə
- Bu ay
