Hikmət Məlikzadədə : Poeziya çələngi- FOTO

Xəbərlər

25.01.2026, 00:09

Hikmət Məlikzadədə : Poeziya çələngi- FOTO

Allahla aramda çəpərdi günah,
Adamlar Allahın adını sevir...
Bu tanış küçədə nə çox ləpir var,
Hamı mən sevdiyim qadını sevir?

Piri də oyuncaq sanırıq bəzən,
Elə bilirik ki, cahilik biz də...
Ay bulud içində sapsarı xaldı,
Tez-tez sular didən sahilik biz də.

Kim belə rəngləyib bu şəkli axı,
Baxırsan, eləcə, kağız bulanıb.
Sanma ki, ürəyə eşq dərman olur,
Bu sözlə gör, neçə ağız bulanıb.

Səni kim göndərib naşı vaxtıma
Köksümdə dərd dağı bitirən qadın?
Qatar yola düşür, inadı tulla
Verdiyim ürəyi itirən qadın.

*****

Ötür yaz dumanı şeh düşən çöldən,
Bu qoca çıxmadı səhərə, nahaq...
Eh, mən də həsrətin hamilə çağı,
Nahaq qayıtmışam şəhərə, nahaq.

Gör o uzaqdakı qızartı nədir,
Vaxtsız əcəl kimi qayıdır şeytan.
Nə tez balaladı bu itlər yenə?
Bax, elə bu itin tayıdır şeytan.

Kənd də yetim qalıb mənimtək indi,
Eh, nədən bağlıdı qapılar burda?
Hardasan, ay ölmüş, gəl, geri dönək,
Nə vaxtsa bir adam tapılar burda.

Şəhvətin sürüşkən divarları çox,
Bu iyrənc böcəklər haradan gəlib?
Nə vaxtsa yuxudan oyadıb səni,
Qəfil deyəcəyəm: Yaradan gəlib!..

*****

İşıqlar dumanda nəm olur bəzən,
İtlər hürən kimi sürülər gedir.
Adam da ağacdı, xəzan düşəndə
Ölür, çiynindəki hürülər gedir...

İnsanlıq, pul kimi hamıda olmur,
Gərək tanıtmayaq piri keçələ...
Molla iki qıza cadu eləyir,
Biri kora gedir, biri keçələ.

Sevmədim, adımı oğru çıxartdı,
Beş-on gün evində qaldığım qadın.
Getdim üzük aldım, balaca çıxdı,
Geri götürmədi aldığım qadın.

Üç şeir oxudum, birin bəyəndin,
Sən “tabut” sözünü day ağıma yaz.
Peyğəmbər olmadım, karına yetim,
Bunu da borc kimi ayağıma yaz...