Müğənni Kenan Doğulu və aktrisa Beren Saatın Los Ancelesin Pacific Palisades bölgəsindəki 2,5 milyon dollarlıq evləri 7 yanvarda baş verən böyük yanğında tamamilə külə dönüb.

"Unikal" Türkiyə KİV-ə istinadən xəbər verir ki, hadisədən aylar keçsə də məşhur cütlük hər gün amerikalı vəkili və sığorta şirkəti ilə mütəmadi əlaqə saxlayır və təzminat tələb edirlər.

“Evin sığortadan nə qədər təzminat alacağı hələ dəqiq bilinmir. Bəzi mənbələr təzminmatın dəyərinin 1 milyon dollar olduğunu qeyd edir. Məşhur cütlüyün evlərini yenidən inşa etdirməsinin dəyəri isə 5 milyon dollardır. Onlar bölgədən köçməyəcək, tikinti başlayanda geri qayıdacaqlar. Kenan Doğulu mövzu ilə bağlı belə açıqlama verib. "Hər gün vəkil və sığortaçılarla danışırıq. Gedən yalnız ev deyil… Bir daha geri gəlməyəcək bəzi parçalar və ortaq xatirələr var"", - deyə KİV yazıb.

Kenan Doğulunun “bir daha gəlməyəcək” dediyi əşyalar arasında dəyəri bu gün 1 milyon dollar olan musiqi studiyası, bəzi xüsusi səs yazıları, dünyaca məşhur hərraclardan topladığı məhdud sayda istehsal edilmiş 15 gitarı, Beren Saatın 2014-cü ildə toyunda geyindiyi ikonik gəlinliyi, toy videoları və fotoları, illər boyu topladıqları 50-dən çox tablo və heykəl var.

Cütlüyə yaxın olan və evləri yanan digər dünya məşhurları arasında Mel Gibson, Paris Hilton, Billy Crystal, Adam Brody və Tom Hanks də yer alır.