Noyabrın 14-də Azərbaycan Dövlət Mədəniyyət və İncəsənət Universitetində (ADMİU) Vətən müharibəsində Zəfərin 5-ci ildönümünə həsr olunmuş “Tarixə çevrilən həqiqət - unutmadıq, unutmarıq …” adlı tədbir və “Allaha Salam” filminin nümayişi keçirilib.

Turaztv.az AZƏRTAC-a istinadən xəbər verir ki, Azərbaycan Respublikasının Dövlət Himni ilə başlayan tədbirdə şəhidlərimizin xatirəsi bir dəqiqəlik sükutla yad edilib.

Tədbiri açan ADMİU-nun rektoru professor Ceyran Mahmudova Prezident İlham Əliyevin Sərəncamı ilə 2025-ci ilin Azərbaycanda “Konstitusiya və Suverenlik İli” olduğunu xatırladıb, Vətən müharibəsində qazanılan şanlı Zəfərin ölkəmiz və bütün Türk dünyası üçün önəmindən danışıb. Bu Zəfərin memarı olan şəhidlərimizin, qazilərimizin, Vətən müharibəsi iştirakçılarımızın hər zaman sayğı və ehtiramla yad edildiyini deyən rektor Ceyran Mahmudova Mədəniyyət və İncəsənət Universitetinin çoxprofilli ali təhsil müəssisəsi kimi bu mövzulara fərqli aspektlərdən yanaşdığını, silsilə tədbirlər həsr etdiyini də vurğulayıb.

Mərasimdə Vətən müharibəsi görüntülərindən və Prezident İlham Əliyevin çıxışlarından ibarət videoçarx nümayiş olunub.

ADMİU-nun Teatr sənəti fakültəsinin Dram teatrı və kino aktyoru kafedrasının müdiri, Əməkdar artist, professor Gülşad Baxşıyeva şəhidlərimizə həsr etdiyi çıxışında onların xatirəsinin xalqımızın qəlbində əbədi yaşayacağını deyib.

Tədbirdə Xalq artisti, ADMİU-nun professoru Məmmədsəfa Qasımovun ifasında şair İlqar Fəhminin “Balaca kişilər” şeiri səsləndirilib.

Sonra ADMİU-nun məzunu, rejissor, şair Xəyal Rzanın “Allaha salam” filmi nümayiş olunub.

Daha sonra filmin ssenari müəllifi və rejissoru Xəyal Rza və baş rolun ifaçısı Xalq artisti Məmmədsəfa Qasımov ekran əsərinin yaranma prosesindən danışıblar. Bu filmin onun diplom işi olduğunu deyən X.Rza vətənpərvərlik mövzusuna həsr olunmuş bir işi ərsəyə gətirdikləri üçün məmnunluğunu söyləyib.

Tədbirdə Milli Məclisin deputatı Səyyad Aran film haqqında fikirlərini bölüşüb, bu mövzuda ekran əsərlərinin çəkilməsinin əhəmiyyətindən danışıb.

ADMİU-nun müəllimi Vüqar Hacıyev və magistratura tələbəsi Əzizəxanım Kazımovanın ifasında vətənpərvərlik mövzusunda mahnılar səsləndirilib.