Azərbaycan Dövlət İqtisad Universitetində (UNEC) Vətən müharibəsinin ildönümünə və Zəfər Gününə həsr olunan beynəlxalq seminar keçirilib.

UNEC-dən AZƏRTAC-a bildirilib ki, tədbir iştirakçıları İkinci Fəxri xiyabanda şəhidlərin məzarını, sonra isə universitetdə şəhidlərin xatirəsinə ucaldılan Memorial-xatirə kompleksini ziyarət ediblər.

Tədbirdə Azərbaycan Respublikasının Dövlət Himni səsləndirilib, şəhidlərin xatirəsi bir dəqiqəlik sükutla anılıb və Zəfər Gününə həsr olunan videoçarx nümayiş edilib.

Beynəlxalq tədbirdə çıxış edən UNEC-in rektoru professor Ədalət Muradov Zəfər Gününü Azərbaycan tarixinin ən parlaq səhifəsi adlandırıb. Bu zəfərin Müzəffər Ali Baş Komandan İlham Əliyevin uğurlu strategiyasının, qüdrətli Azərbaycan Ordusunun, eləcə də ölkənin iqtisadi inkişafının Zəfəri olduğunu deyib. Rektor hərbi zəfərin ölkənin bütün sahələrinə transformasiyasını qarşıda duran ən mühüm vəzifələrdən biri adlandırıb.

Sonra hərbi ekspert, ehtiyatda olan polkovnik Şair Ramaldanov Azərbaycan Ordusunun Vətən müharibəsində nümayiş etdirdiyi ruh yüksəkliyindən, qətiyyət və əzmkarlığından, yüksək mənəvi hazırlığından söz açıb. Müasir texnika və silahlarla təchiz olunmuş ordunun Aprel döyüşlərindən, Füzuli, Qubadlı, Zəngilan, Hadrut, Cəbrayıl, Şuşa uğrunda gedən azadlıq mübarizəsindən danışıb.

Vətən müharibəsində qazi olan UNEC-in tələbəsi Qaryağdı Adıgözəlov döyüş yoluna qısa nəzər salıb, Zəfər Günü xəbərini alması sevincini iştirakçılarla bölüşüb.

Tədbirə onlayn qoşulan Türkiyənin Bursa Uludağ Universitetinin professoru Fərhat Pirinççi 44 günlük Vətən müharibəsində əldə olunan qələbənin bütün türk dünyası üçün əhəmiyyətini vurğulayıb, bu savaşda tətbiq olunan hərbi strategiyanın dünya hərb tarixində yeni olduğunu diqqətə çatdırıb. Ermənistanın təcavüzkar siyasətinə qarşı Azərbaycanın hər zaman sülh tərəfdarı kimi çıxış etdiyini deyən professor, ölkəmizin Vətən müharibəsində yalnız hərb meydanında deyil, həm də informasiya savaşında beynəlxalq aləmdə qələbə qazandığını bildirib. O, Füzuli Beynəlxalq Hava Limanının qısa zamanda açılmasını dünya tarixində bənzəri olmayan inkişaf adlandırıb.

Beynəlxalq seminara Türkiyə, Almaniya, Ukrayna, Portuqaliya, Qazaxıstan və digər ölkələrdən xarici qonaqlar onlayn formatda qoşulublar.

Çıxışlardan sonra tədbir UNEC Yaradıcılıq Mərkəzinin üzvlərinin iştirakı ilə bədii proqramla davam edib.

Tədbir çərçivəsində UNEC Dizayn Məktəbinin tələbələrinin, eləcə də dizayn ixtisası üzrə təhsil alan magistrantların Zəfər Gününə həsr olunan rəsm əsərləri nümayiş olunub.
Beynəlxalq seminar UNEC-in rəsmi feysbuk səhifəsində canlı yayımlanıb.