Azərbaycan Respublikası Müdafiə Nazirliyinin dəstəyi, “Fire Land Production” və “Azman Holdinq”in təşkilatçılığı ilə Vətən müharibəsində şəhid olan qəhrəmanların xatirəsinə həsr olunmuş “Mənim atam qəhrəmandır” və “Mənim oğlum qəhrəmandır” adlı silsilə layihələrin davamı kimi şəhid yaxınları, dövlət rəsmiləri, ictimai xadimlər və incəsənət nümayəndələrinin iştirak etdiyi Ramazan bayramı münasibətilə tədbir keçirilib, qonaqlar üçün iftar süfrəsi təşkil olunub.

Turaztv.az AZƏRTAC-a istinadən xəbər verir ki, tədbirin məqsədi torpaqlarımız uğrunda canından keçən qəhrəmanlarımızı anmaq, onların övladlarına xalq qayğısının daimi olacağını bir daha hiss etdirmək, şəhid balalarının səmərəli istirahətini təşkil etməkdir.

Mərasimdə əvvəlcə xalqımızın ümummilli lideri Heydər Əliyevin, Azərbaycanın müstəqilliyi, ərazi bütövlüyü və suverenliyi uğrunda şəhid olanların xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.

Nazirliyin nümayəndəsi Elvin Əzizov, Milli Məclisin deputatları Ziyad Səmədzadə və Arzu Nağıyev, ilahiyyatçı alim Şahin Həsənli öz çıxışlarında Vətən müharibəsində dövlətimizin sarsılmaz iradəsindən, şəhidlərimizin Vətən uğrunda gedən döyüşlərdə göstərdikləri şücaətdən, eləcə də Ali Baş Komandanın rəhbərliyi ilə Azərbaycan Ordusunun qazandığı tarixi qələbədən, bu zəfərin əhəmiyyətindən, şəhidliyin İslamdakı uca məqamından danışıblar.

Şəhidlərin ailə üzvləri və yaxınları göstərilən diqqət və qayğıya, eləcə də şəhidlərimizin xatirəsinin uca tutulduğuna görə Azərbaycan Respublikasının Prezidentinə, Müdafiə Nazirliyinin rəhbərliyinə və “Fire Land Production” ailəsinə minnətdarlıqlarını bildiriblər.