“Qalatasaray”ın sabiq futbolçusu Yusuf Demir İstanbul klubundakı dönəmi ilə bağlı diqqətçəkən açıqlamalar verib.

"Turaztv.az" “Qafqazinfo”-ya istinadən xəbər verir ki, 2022-ci ildə “Rapid Wien”dən “Qalatasaray”a transfer olunan, lakin İstanbul klubunda gözləntiləri doğrulda bilməyən Demir 2026-cı ilin fevralında komandanı tərk edərək keçmiş klubuna qayıdıb.

23 yaşlı futbolçu “SK Rapid Podcast” proqramında “Qalatasaray”dakı günlərindən danışarkən xüsusilə 2022-ci ildə yaşadığı zədə və həmin dövrdə qarşılaşdığı tibbi proseslə bağlı etirafları ilə diqqət çəkib.

Yusuf Demir 2022-ci ilin sentyabrında Avstriya U-21 millisinin düşərgəsindən İstanbula topuq zədəsi ilə qayıtdığını bildirib. Onun sözlərinə görə, zədə o qədər ciddi olub ki, “Adana Demirspor”la oyuna hazırlaşdığı vaxt nə məşq edə, nə də futbol ayaqqabısı geyinə bilib.

Həmin dönəmdə yaşadıqlarını xatırlayan Demir “Qalatasaray”dakı prosesin onun üçün olduqca çətin keçdiyini deyib: “Qalatasaray”ın həkimi mənə dedi ki, sənə sistem vuracağıq, sonra bizimlə səfərə çıxa bilərsən. Əlbəttə, imtina etdim. Çünki şprisin içində nə olduğunu bilmirdim”.

Futbolçu tibbi proses zamanı yaşadıqlarının onu ciddi şəkildə narahat etdiyini və baş verənlərə təəccübləndiyini də vurğulayıb.

Demir bununla kifayətlənməyərək “Qalatasaray”ın klub daxilindəki vəziyyətlə bağlı da diqqətçəkən ifadələr işlədib.

“Qalatasaray”ın dünya üzrə 40 milyondan çox azarkeşi olduğunu bildirən futbolçu belə deyib: “Qalatasarayın dünya miqyasında 40 milyondan çox azarkeşi var, lakin klubun daxilində baş verən bəzi şeyləri görmək istəyən çox az adam var”.

Yusuf Demir 2022-ci ilin sentyabrında “Rapid Wien”dən “Qalatasaray”a transfer olunub. Avstriyalı futbolçu İstanbul klubunda keçirdiyi təxminən 4 il ərzində cəmi 26 rəsmi oyunda meydana çıxıb.

Bu qarşılaşmalarda 2 qol və 2 məhsuldar ötürmə ilə yadda qalan Demir 2026-cı ilin fevralında “Qalatasaray”dan ayrılıb və “Rapid Wien”ə geri dönüb.