Bu gün Hindistan kinosunun əfsanəsi, “Bollywood”un kralı adlandırılan Şahrux Xanın 60 yaşı tamam olur.

"Turaztv.az" “Qafqazinfo”-ya istinadən xəbər verir ki, 2 noyabr 1965-ci ildə Yeni Dehlidə anadan olan aktyor artıq 30 ildən çoxdur ki, dünya kino sənayesində sevilən simalardandır.

Xan 90-cı illərin əvvəllərindən Hindistan kinosunda romantik qəhrəman obrazları ilə tanınıb. Sonradan o, həm dramatik, həm də sosial məzmunlu filmlərdə çıxış edərək çoxşaxəli aktyor kimi qəbul olunub.

Onun ən məşhur filmlərinə “Dilwale Dulhania Le Jayenge” (1995), “Baazigar” (1993), “Veer-Zaara” (2004), “Swades” (2004) və “My Name Is Khan” (2010) daxildir.

“Dilwale Dulhania Le Jayenge” filmi bu gün də Hindistanda kino klassikası sayılır və onun romantik qəhrəman imicini möhkəmləndirib.

O, ən məşhur filmlərindən biri olan “My Name Is Khan”da isə autizmli bir kişinin hekayəsi vasitəsilə sosial mesaj ötürərək beynəlxalq arenada böyük rəğbət qazanıb.

60 illik yubileyini qeyd edən Şahrux Xan bu gün də həm Hindistanda, həm də dünyanın bir çox ölkəsində milyonlarla pərəstişkarı olan ulduzdur.

O, təkcə aktyor kimi deyil, həm də prodüser və xeyriyyəçi kimi tanınır.