“Proceedings of the National Academy of Sciences” jurnalında dərc olunan yeni araşdırmaya görə, fiziki fəaliyyət başqa bədən funksiyalarına xərclənən enerjiyə qənaət etmədən gündəlik ümumi kalori sərfini artırır.

Turaztv.az AZƏRTAC-a istinadən xəbər verir ki, araşdırma Virciniya, Aberdin və Şençjen universitetlərinin alimləri tərəfindən aparılıb. Mütəxəssislər müəyyən ediblər ki, insan nə qədər çox hərəkət etsə, bir o qədər çox enerji sərf edir və bu, bədənin digər funksiyalarında enerji azaldılması ilə kompensasiya olunmur.

Tədqiqatda iştirakçılar iki həftə ərzində oksigen və hidrogen izotopları içib, onların sidik nümunələri toplanıb. Bu üsulla gündəlik enerji sərfi, yəni yandırılan kalori miqdarı dəqiqliklə ölçülüb. Fiziki aktivlik isə belə taxılan sensorlarla izlənilib.

Nəticələr göstərib ki, oturaq həyat tərzi keçirənlərdən tutmuş dözümlü qaçışçılara qədər bütün iştirakçılarda daha çox hərəkət, daha çox kalori yandırılması ilə əlaqəlidir. Bədən tənəffüs, qan dövranı və temperaturun qorunması kimi əsas funksiyalar üçün sərf olunan enerjini azaltmadan, kənar fəaliyyət zamanı əlavə kalori sərf edir.

Tədqiqatçılar bildiriblər ki, fiziki aktivliyin artırılması sağlamlıq üçün faydalı olmaqla yanaşı, ümumi enerji sərfini də yüksəldir. Bununla belə, enerji kompensasiyasının hansı şəraitdə baş verdiyini anlamaq üçün daha çox araşdırmaya ehtiyac var.