Bu il ali təhsil müəssisələrinə qəbul imtahanlarında göstərdiyi yüksək nəticəyə görə Prezident təqaüdünə layiq görülən tələbələrdən biri də Gülay Mürvətovadır. O, Azərbaycan Respublikasının Prezidenti yanında Dövlət İdarəçilik Akademiyasında hüquqşünaslıq ixtisası üzrə təhsil alır. Gülay Mürvətova AZƏRTAC-a müsahibəsində onu bu uğura aparan yoldan, qarşılaşdığı çətinliklərdən, gələcək planlarından söz açıb.

– Gülay, səni Prezident təqaüdünə layiq görülməyin münasibətilə təbrik edirik! Bu uğura necə nail oldun? İmtahanlara hazırlıq prosesin necə keçdi?

-İmtahanlara ciddi şəkildə hazırlaşırdım, çünki qarşıma böyük bir məqsəd qoymuşdum. Bilirdim ki, buna çatmaq üçün çox çalışmalıyam. Mövzuları təkrar etmək mənim üçün əsas idi – dərsləri nə qədər çox təkrarlayırdımsa, bir o qədər yaxşı yadda qalırdı.

– Hansı fənlərə daha çox diqqət ayırırdın?

-Ən çox riyaziyyata üstünlük verirdim. Mənə elə gəlirdi ki, riyaziyyatda o biri fənlərdə olduğum kimi çox güclü deyiləm və buna görə də ona daha çox vaxt ayırmalıyam. Amma ümumiyyətlə, bütün fənlərlə nizamlı şəkildə, vaxtında məşğul olurdum.

– Qəbul imtahanından neçə bal topladın?

-692,5 bal.

– Bu qədər yüksək nəticə əldə etmək üçün, yəqin ki, gündəlik həyatında müəyyən məhdudiyyətlərə dözmüsən…

-Bəli, vaxtımın çox hissəsini dərsə ayırdığım üçün tez-tez yorğun olurdum. Dostlarımla, ailəmlə bir yerdə vaxt keçirə bilmirdim. Bəzən həll edə bilmədiyim tapşırıqlar, suallar məndə narahatlıq yaradırdı, amma üzərində daha çox çalışaraq onları da aydınlaşdırırdım.

– Niyə məhz hüquqşünaslıq ixtisasını seçdin?

-Üçüncü ixtisas qrupunu seçməyimin əsas səbəbi hüquqşünaslığa olan marağım idi. Hüquqşünasların bütün qanunlar, qərarlar haqqında zəngin biliyi, cəmiyyətdə onlara olan ehtiyac məndə bu sahəyə maraq oyadıb. Valideynlərim də bu qərarıma tam dəstək verdilər.

– Səni ən çox motivasiya edən nə idi?

-Ən böyük motivasiyam gələcəkdə özümü görmək istədiyim peşə və valideynlərimin mənə olan inamı idi. Bu yolda mənə müəllimlərim, ailəm və dostlarım böyük dəstək oldular.

– Prezident təqaüdünə layiq görülmək sənə hansı hissləri yaşatdı?

-Prezident təqaüdü mənim zəhmətimin, səylə çalışmağımın və bütün bunların nəticəsində əldə etdiyim uğurun dəyərləndirilməsidir. Bu təqaüdə layiq görülmək mənim üçün böyük bir şərəfdir.

– Gələcək planların haqqında nə deyə bilərsən?

-Hüquq sahəsində çalışmaq və hakim olmaq istəyirəm. Xaricdə magistratura təhsili almaq və elmi fəaliyyət sahəsində çalışmağı qarşıma məqsəd qoymuşam.

– Boş vaxtlarını necə keçirirsən?

-Rəsm çəkməyi, musiqi dinləməyi, kitab oxumağı və xarici dildə film izləməyi sevirəm.

– Uğur qazanmaq istəyən gənclərə nə tövsiyə edərdin?

-Ən vacibi, özünüzə inanın! Qarşınıza məqsəd qoyun və ona doğru ardıcıl irəliləyin. Bu yolda bəzən dostlarla vaxt keçirməkdən imtina etməli, daha çox dərs oxumalı olacaqsınız. Qarşınıza çıxan çətinliklər sizi ruhdan salmasın. Əksinə, onları aşaraq daha da əzmkar olun. Zəhmətinizin bəhrəsini mütləq görəcəksiniz.

Gülay Mürvətovanın nailiyyəti bir daha göstərir ki, qətiyyət, düzgün planlama və dəstəkləyici mühit gənclərin həyatında böyük uğurların açarı ola bilər. Gülaya təhsilində və gələcək karyerasında uğurlar arzu edirik!