Bu gün Vətən müharibəsi dövründə Ermənistan Silahlı Qüvvələrinin Gəncə şəhərini üçüncü dəfə raket atəşinə tutmasından 5 il keçir.

“Qafqazinfo”nun məlumatına görə, 2020-ci ilin oktyabrın 8-nə keçən gecə Azərbaycanın ikinci ən böyük şəhəri olan Gəncə növbəti dəfə Ermənistanın hərbi təcavüzünə məruz qalıb.
Ətraflı

Belə ki, həmin gecə endirilən raket zərbəsi nəticəsində xəsarət alan olmasa da, şəhərdə bir çox yaşayış evləri və nəqliyyat vasitələri dağılıb, mülki infrastruktur ciddi zərər görüb.

Xatırladaq ki, İkinci Qarabağ müharibəsi zamanı Ermənistan silahlı qüvvələri Gəncə şəhərini ümumilikdə beş dəfə – 4, 5, 8, 11 və 17 oktyabr tarixlərində raket və ağır artilleriya ilə hədəfə alıb. Bu hücumlar nəticəsində 26 nəfər həyatını itirib, 175 nəfər yaralanıb. Şəhərin müxtəlif ərazilərində yerləşən yaşayış binaları, ictimai obyektlər və avtomobillərə maddi ziyan dəyib.

Ümumilikdə, 44 günlük Vətən müharibəsi dövründə Ermənistanın hərbi təcavüzü nəticəsində 12-si uşaq, 27-si qadın olmaqla 93 mülki şəxs həlak olub, 454 nəfər yaralanıb. Rəsmi məlumatlara görə, 12 mindən çox yaşayış və qeyri-yaşayış sahəsinə, yüzlərlə nəqliyyat vasitəsinə və fermer təsərrüfatına ciddi zərər dəyib.