"Gürcüstanın siyasi sistemini canlandırmaq lazımdır. Bunun üçün əsas vəzifə xarici agentləri və rezidentləri Gürcüstan siyasətindən uzaqlaşdırmaqdır".

Turaztv.az AZƏRTAC-a istinadən xəbər verir ki, bu sözləri mətbuata açıqlamasında Gürcüstanın Baş naziri İrakli Kobaxidze söyləyib.

Baş nazir 2028-ci ildə keçiriləcək seçkilərə yeni siyasi spektrlə yanaşılacağına ümid etdiyini bildirib. Hökumət başçısı qeyd edib ki, Gürcüstan siyasətində bir nəfər də olsun xarici agent qalmamalıdır.

"Biz artıq oktyabrın 5-də 2028-ci il parlament seçkilərinə hazırlığa başlamışıq. Biz bütün cəbhələrdə hazırlaşırıq. Ümid edirik ölkəmiz 2028-ci il seçkilərini yenilənmiş siyasi spektrlə qarşılayacaq. Bu vacibdir. Gürcüstan siyasətində artıq heç bir xarici agent olmamalıdır. Gürcüstan siyasətində heç bir xarici agent qalmamalıdır. Biz buna nail olmaq üçün bütün hüquqi vasitələrdən, o cümlədən Konstitusiyadan istifadə edəcəyik. Bu, bizim ən vacib alətlərimizdən biridir", – deyə Kobaxidze vurğulayıb.