Eşitdik ki, 46 il əvvəl Tovuz rayonunun Xatınlı Çilovdarlı kəndində sadə bir ailədə dünyaya göz açan Fazilə Rüstəmovanın oktyabrın 8-də ad günüdür. Onu çoxdan tanıyıram. “Azərbaycan”nəşriyyatına tez-tez gələn Fazilə xanım olduqca maraqlı adamdır. Tanınmış jurnalist, istedadlı qələm sahibi Müşfiq Çobanoğlunun rəhbərlik etdiyi “Şərqin səsi”və “Elm və Təhsil”qəzetlərinin redaksiyasında rastlaşmışıq. Orta məktəbi bitirib M.Əliyev adına Azərbaycan Dövlət İncəsənət Universitetinin reklam üzrə icraçı-rəssam ixtisasına yiyələnib. Ali məktəbi qırmızı diplomla başa vurub. Sonra Tovuz rayon Mədəniyyət evində çalışıb.
Lap uşaqlıqdan poeziyaya, jurnalistikaya meyli, həvəsi olub. Ara-sıra məqalə və şeirlər yazıb. Orta məktəbdə rəsmləri həmişə mükafatlara layiq görülüb, şeirləri ilə yarışmalarda qalib çıxaraq diplomlarla mükafatlandırılıb.
Qeyd etdiyim kimi, F.Rüstəmovanın həyatı ziqzaqlı olub, qarşısına çıxan çətinliklərdən zəkasının, iradəsinin, əməksevərliyinin sayəsində alnıaçıq, üzüağ çıxıb.
Həyat və fəaliyyətini Bakıyla bağlayan Fazilə xanım uzun müddət şəhərimizdə təşkil edilmiş vətənpərvərlik tədbirlərində yaxından iştirak edib. Qazilərlə bağlı təşkil edilmiş tədbirlərdə, idman yarışlarının keçirildiyi məkanlarda xüsusi fəallıq göstərib. Həmin tədbirlərdə çəkdiyi fotoşəkillər iştirak edən hər kəsin zövqünü oxşayıb. Bu səbəbdəndir ki, o, hamının sevimlisinə çevrilib.
İlk dəfədir ki, onun haqqında yazılır. Bir az tərəddüd etdi, amma jurnalistlik təcrübəmdən istifadə edib məqsədimə nail oldum. Qısa tərcümeyi-halı olsa da, həyat təcrübəsi zəngindir. İştirak etdiyim tədbirlərdə onun haqqında xoş sözlərin deyildiyinin şahidi olmuşam. Bütün varlığı ilə ailəsinə bağlı olub. Avıl Əhməd oğlu Rüstəmovu, analarını ehtiramla xatırlayır. Söz düşəndə deyir ki, bütün həyatı, varlığı ailəsinə bağlıdır.
Qadın Tanrıdan sonra ikinci yaradıcı qüvvəyə malik şəxsdir. Qadın atasına qız, anasına həmdəm, qardaşına bacı, sevdiyi şəxsə məhəbbət, övladına anadır. Qadın zəhmətkeşdir, sevgi doludur, bütün ağrısını, acısını gözlərinin dərinliklərində dəfn edib həyata, sevdiyinə, valideyninə, övladına, cəmiyyətə gülümsəməyi bacarandır. Qadın yaşından, bədənindən, qüvvəsindən qat-qat ağır yükün öhdəsindən sevdiklərinin xətrinə dodaqlarındakı təbəssümü ilə gələn fədakardır. Qadın "kipriyi ilə od götürüb, saçlarını süpürgə etməyi" bacarandır. Fazilə Avdıl qızı Rüstəmova da məhz belə qadınlardandır.
Bu cür tanıdıqdan sonra bir daha əmin olduq ki, fədakar və zəhmətkeş Azərbaycan qadınları bacarıqları ilə cəmiyyətimizin inkişafına da əvəzolunmaz töhfələr verirlər. Vətənimizin çiçəklənməsi üçün yorulmadan çalışırlar.
Sonda isə səbəbkarımızı – Fazilə xanımı ad günü münasibətilə ürəkdən təbrik edir, ona cansağlığı, xoşbxətlik və yaradıcılıq uğurları arzulayırıq.


(İstedadlı yazar, kövrək duyğulu, incə qəlbli, təvazökar, qayğıkeş, mehriban və səmimi insan Aytən xanım Tovuzluya)



Daşdəmir ƏJDƏROĞLU,
jurnalist