Zaman ötür, fəsillər dəyişir, günlər illərə, illər əsrlərə çevrilir, tarixə dönür. Zamanla bir çox tarixi hadisələr baş verir. Bəzi tarixi hadisələr müəyyən vaxtdan sonra yaddan çıxıb unudulur. Lakin elə zaman, tarixi hadisələr varki unudulmur. Nəsillər bir birini əvəz etdikcə tarixi gün daha da çox xatırlanır, insanların yolunu işıqlı bir zirvəyə doğru aparır. Bu zirvə ən ali, müqəddəs və şərəfli şəhidlik zirvəsidir.

Şəhidlər ölmür, əbədi yaşayır-deyirlər. Allahın insanlara göndərdiyi müqəddəs Quranı- Kərimdə də buyrulur "Şəhidlərə ölü deməyin,onlar diridirlər və Allahın nemətləri ilə faydalanırlar!" Şəhidlik ölümlərin ən şərəflisidir. 1973-ci ilin 15 avqustunda Sabirabadın Çığırğan kəndində göz açan və şərəfli ömür yaşayıb torpaqlarımız uğrunda 1992-ci ildə şəhidlik zirvəsinə yüksələn Xəlilov Cəlal Eldar oğlu da belə igidlərimizdən idi.

Ləyaqətli, zəhmətkeş bir ailədə dünyaya göz açan, böyüyən Cəlal Xəlilov öz elinə,obasına,torpagına bağlı,millətini sevən, valideynlərinə qayğıkeş bir oğul idi. O böyük qardaşı Raufdan onun yollarına örnək olacaq şəxsi keyfiyyətləri özündə əks etdirirdi. Cəlal Xəlilov od,alov içərisində olan torpaqlarımız uğrunda döyüşlərə atılarkən onun sərrast atıcılığı komandirlərin diqqətindən yayınmamışdır.

İgid,qorxmaz və mərd olan bu döyüşçü haqqında çox danışmaq olar. Onun şərəfli ömür yollarına boylandıqca yüksək insani keyfiyyətləri göz önündə canlanır. 1992-ci ildə torpaqlarımız uğrunda döyüşlərdə həlak olan şəhidimizin müqəddəs məzarı Sabirabadın Çığırğan kəndindədir. Rauf və Cəlal Eldar oğlu Xəlilovlar öz doğma torpaqlarının,müqəddəs vətənimizin uğrunda döyüşən və şərəfli ömür yolu keçən igid ogullardandir. Allah onlara və bütün şəhidlərimizə rəhmət eləsin!

Samir Xanaliyev