ELXAN ÇIRAQLI: Mənsiz qalan dünya

Xəbərlər

12.12.2023, 22:42

ELXAN ÇIRAQLI: Mənsiz qalan dünya - FOTO

Mənsiz qalan dünya

Bir gün tumar çəkib mənim saçıma
Qolumdan yapışıb get deyəcəkdir
Turşudub üzünü tutacaq yana
Əlini üstümdən götürəcəkdir.
Mənsiz qalacaqdır o dağ , dərələr
Əkdiyim ağaclar, tər bənövşələr.
Gözləri dörd olub axtaracaqdır
Meşədə marallar, ceyran - cüyürlər.
Bir zaman gəzdiyim səfalı yerlər
Keçmişə dönərək düşəcək yada.
Xəyal olacağam mən bu dünyada.
Göylər guruldayıb şimşək çaxanda
Damcı- damcı yağış olub
Düşəcəyəm yarpaqlardan torpağa.
O səs oxşayacaq , bilirsiz nəyə
Divar saatının tık- tık səsinə.
Hirsi yatmış çaylar sakit axanda
Sular üzərində görünəcəm mən
Ay batıb gündüzlər günəş çıxanda
Boylanıb baxacam kölgələrimdən.
Olacam bir parça Vətən torpağı
Keşiyimdə durub igid əsgərlər.
Kim ki, düşmən olub bizə kəm baxar
Çəkəcək sinəsi sagalmaz dağı.
Ölümdən qorxmuram, nədən qorxum ki?!
Axı, əzizlərim yatır orada
Şükür, qovuşaram ata,anama
Görüş bir məlhəmdir yaralarıma.
Rahat olmayacaq yenə də ruhum
Axı burada qalıb qızım və oğlum.
Ay keçər, il ötər, gələr bir zaman
Doğmalar toplaşar yenə bir evə.
Elxan, dözməlisən bilirsən niyə
Belə qayda qoymuş Tanrı bizlərə.