Xəbərlər
12.02.2023, 23:19
Hüseyn Məmmədov: BİR SƏS MƏNİ DİKSİNDİRDİ - FOTO
BİR SƏS MƏNİ DİKSİNDİRDİ
Dərin uğultu kimi qulaqlarıma dolan yanıqlı bir səs məni diksindirdi: Qardaş Türkiyədə zəlzələ baş verib. Bir anlıq gözlərimdə acı göynərti hiss etdim. Sosial şəbəkələrdən faciəni seyr edəndə hamı kimi, mən də bərk sarsıldım. Amma nə edə bilərdim, əlim heç hara çatmır... Elə digər insanlar da mənim kimi, bilmirdi Türk xalqına necə kömək etsin.
Hətta məktəbli uşaqlar da televiziya kanallarında edilən yardımları görüb qürur hissi keçirmiş, onlar da öz köməkliklərini göstərmək istəmişlər. O şagirdlərdən biri də Neftçala şəhərindəki məktəblərdən birində oxuyan Vətən təəssüblü bir şagirddir. Onun oxuduğu məktəbin müəllimi Emin müəllim bununla bağlı sosial şəbəkədə paylaşım etmişdi. Oxuyanda, damarlarımda qan dayandı. Elnur müəllim yazmışdı ki, məktəbin dəhlizi ilə gedirdim, arxadan bir nəfər məni səslədi. Çevrilib arxaya baxdım, gördüm ki, məktəbimizin şagirdlərindəndir. Mənə çatanda barmaqları yarı bükülü halda əlini mənə uzadaraq dedi ki, Elnur müəllim, bu pulu mənə valideynlərim məktəb üçün verib, mən də Türkiyədə zəlzələdən zərər çəkən uşaqlara göndərmək istəyirəm. Mən bir anlıq xəyala daldım, şagirdimin boynunu qucaqlayıb dedim ki, hələ dövlət tərəfindən məktəblərə kömək haqqında məlumat gəlməyib...
Şagirdin Elnur müəllimə cavabı bir uşağın gələcək vətəndaşlıq əzmindən xəbər verir: “Elnur müəllim, əslində, Türkiyədəki zəlzələdən zərər görmüş, yaralanmış və həyatlarlını itirmiş insanlar bizim qardaş-bacılarımızdır. Kömək üçün bizə kimsə nəsə deməməlidir. Bunu biz şagirdlər də özümüz təşkil etməliyik. Bu, bizim vətəndaşlıq, qardaşlıq borcumuzdur”.
Bu məktəbli şagird Neftçala rayonundakı məktəblərin birində beşinci sinifdə oxuyur. Açığı, bir məktəblinin içində qaynayan insanlıq hissi məni çox məmnun etdi, bir-iki kəlmə onun bu insanlıq dərəcəsi barədə fikir ifadə etmək istədim...
Allah bizi dərd-bəladan hifz etsin!
Hüseyn İsaoğlu (Məmmədov )
Yazıçı- publisist.
Son xəbərlər
Ən çox oxunanlar
- Bu gün
- Bu həftə
- Bu ay
