Duyğular - Cümşüd Aydəmirov

Xəbərlər

28.02.2022, 21:29

Duyğular - Cümşüd Aydəmirov

Duyğular
Ömrün bir qışı da düşdü təqvimdən,
Burnuma nərgizin qoxusu gəlir.
Son qarı yenicə görən bənövşə,
Bəlkə tez gəlmişəm,üşüdüm deyir.

Qışdan sağ salamat çıxan qocalar,
Çiləni ötürdüm,"ya Allah!"deyir.
Çiçəyi çırtdayan tumurcuq qızlar,
Bahar sevgisini necə gözləyir?

Mart çıxdı,dərd çıxdı deyib atalar,
Mart gəlib özüylə bahar gətirir.
Bu gecə yuxuma girmişdi anam,
Gördüm ki,"Novruz"luq qoğal bişirir.

Yadıma düşdükcə yenə o günlər,
Qəlbimdən elə bir gizilti keçir.
Səhər namazına duran nənəmin,
Şirin avazıyla bülbül deyişir.

Namazın bitirib dururdu nənəm,
Astaca gəlirdi pəncərə tərəf.
Onun bir tayını açırdı nənəm,
Bülbül hey oxuyur, ötürdü səf-səf.

Zümzümə səsinə qoca nənəmin,
Bülbül nalə çəkir,fəğan edirdi.
Elə bil tapmışdı bülbül həmdəmin,
Yanıqlı səsiylə zil-zil ötürdü.

Curu rexi xidi vun ksanvaçni?
(Saqqalı ağarmış yatmamısan ki?)
Məni oyaq görüb gülümsünürdü.
Mənim avam nənəm,müdrik nənəmin,
Bildiyi yeganə ləzgi diliydi!

Uyuşa bilmirdi heç cür şəhərə,
Bakı nənəm üçün dar görsənirdi.
Elə öyrəşmişdi kəndə kəsəyə,
Evindən kənarda qəribsəyirdi.

Mənzərə dəyişib indi aləmdə,
Xəbərlər acıdır,xəbərlər iti!
Oxumaq istəmir daha bülbül də,
Misranı titrədir partlayış səsi!

Zamanın axarı dəyişib yaman,
Təbiət necə də zora düşübdür.
Ahəngin dəyişib dünyanın insan,
Torpaq inildəyir,gücə düşübdür.

Baharı tərənnüm eyləyən şeir,
Qoşulmaq istəmir söz sırasına!
Utana-utana mənəm söyləyir,
Çevrilmək istəmir üz qarasına!

Sevgilər olacaq,sevən olacaq,
Bəstələr olacaq gözəl sözlərə!
Amma ki,arada xiffət olacaq,
Əfsus,söylənəcək ötən o günə!

Ömrün bir qışı da düşdü təqvimdən,
Burnuma nərgizin qoxusu gəlir!
Son qarı yenicə görən bənövşə,
Bəlkə tez gəlmişəm, üşüdüm deyir!

Cümşüd Aydəmirov,
Xudat. 25.02.22