Bu gün 30 ildir həsrət qaldığımız Qarabağda bayrağımız dalğalanır. Bu bizim üçün çox qürurvericidir. Biz indiyə qədər möhtəşəm Qələbənin təsirindən çıxa bilməmişik. Çünki biz əsl Qələbəyə layiq idik. Həmçinin haqq mübarizəsi aparırdıq.

Bu sözləri AZƏRTAC-a müsahibəsində Vətən müharibəsi iştirakçısı Qorxmaz Nəsirov deyib.

“Qorxmaz vətən övladları bu hissi bizə, xalqımıza yaşatdılar. Biz ermənilərin biyabırçı məğlubiyyətlərinə keçən ilin bu günü Zəfər paradında əyani şahidlik etdik. Onların döyüşdə atıb qaçdıqları texnikanın paradda nümayiş olunması bizə həm ruh yüksəkliyi, həm də qürur hissi yaşatdı. Mən Zəfər paradını izləyəndə ikiqat sevinirəm, çünki burada mənim də payım olub. Xalqımıza bu Qələbəni yaşadan Müzəffər Ali Baş Komandan, Prezident İlham Əliyevə və Azərbaycan Ordusuna, torpaqlarımız uğrunda canlarından keçən qəhrəman oğullarımıza minnətdarıq. Onlar heç zaman unudulmayacaq. Zəfər paradı Azərbaycan Ordusunun gücünü hər kəsə göstərdi”, - deyə Q.Nəsirov vurğulayıb.