Hazırda Səhiyyə Nazirliyinin Elmi-Tədqiqat Tibbi Bərpa İnstitutunda stasionar müalicə olunuram. Dizlərimdəki problemlərlə əlaqədar müxtəlif fizioterapiya, lazer şüası və digər prosedurlardan keçirəm. Artıq beş gündür müalicəm davam edir.
Bu dəfə müalicə aldığım müəssisədə məni başqa bir aləm də özünə çəkdi – kitabxana.

İnstitutun kitabxanası ilə tanış olarkən sanki ağrılarımı bir anlıq unutdum. Rəflərdə sıralanan kitablar insanda xoş ovqat və mənəvi rahatlıq yaradır. Burada on mindən çox tibbi, elmi və bədii kitabın qorunduğunu öyrəndim. Bu, sadəcə böyük bir kitab fondu deyil, həm də qiymətli mənəvi xəzinədir.
Kitabxananın direktoru Rüsxanə İsmayılova bizi mehribanlıqla qarşıladı. Elmi şöbənin tərcüməçisi Səbinə Süleymanova, kitabxanaçı Yavər Ağamalıyeva isə səmimi münasibətləri ilə xoş təəssürat yaratdılar. Onların kitaba və oxucuya olan münasibəti təqdirəlayiqdir.
Mən də “Ömür yollarım” şeirlər kitabımı kitabxananın fonduna hədiyyə etdim. Kitabımın burada özünə yer tapması məni ürəkdən sevindirdi. Bir müəllif üçün yazdığı kitabın kitabxanaya qəbul olunması onun əməyinə verilən mənəvi qiymətdir. Bu xoş görüşü xatirə şəkli ilə də əbədiləşdirdik.
Kitabxana ilə tanışlıq məndə bir daha belə qənaət yaratdı ki, kitabxanalara diqqət və qayğı daim artırılmalıdır. Çünki kitabxanaçı sadəcə kitab verib-alan əməkdaş deyil, elmin, ədəbiyyatın və mənəviyyatın keşikçisidir.

Vaxtilə kitabxana işçilərinə iş şəraitinin xüsusiyyətləri nəzərə alınaraq süd verilməsi ənənəsi də olub. Bunun əsas səbəblərindən biri onların uzun müddət kitab, kağız və tozlu mühitdə işləməsi idi. Bu ənənənin müasir formada yenidən tətbiqi barədə düşünmək, ən azı kitabxana əməkdaşlarının sağlamlığına və sosial təminatına xüsusi diqqət göstərmək faydalı olardı.
Axı kitabın tozunu udmaq da bir zəhmətdir. O tozun içində neçə-neçə alimin biliyi, şairin duyğusu, yazıçının düşüncəsi, xalqın yaddaşı yaşayır.
Bu gün elektron informasiya vasitələri geniş yayılsa da, kitabın və kitabxananın dəyəri azalmır. Əksinə, insanı kitabla üz-üzə gətirən belə məkanların qorunmasına və inkişafına daha böyük ehtiyac var.
Mən bu gün burada yalnız müalicə almıram. Kitabların arasında mənəvi rahatlıq da tapıram.
Bədənə dərman, ruha isə kitab lazımdır.