Bakı Dövlət Universitetinin Jurnalistika fakültəsini bitirən Tamella xanım təhsilini elmi fəaliyyətlə davam etdirdi. 1992-ci ildə "Azərbaycan–Amerika ədəbi əlaqələri" mövzusunda namizədlik dissertasiyasını uğurla müdafiə edərək filologiya elmləri namizədi alimlik dərəcəsini aldı. Lakin onun elmi fəaliyyəti bununla bitmədi. Elmə və təhsilə olan sevgisi onu sərhədlərdən kənara apardı.
1998-ci ildə qardaş Türkiyənin Eskişəhər Osmanqazi Universitetindən aldığı dəvəti böyük məsuliyyət və sevgi ilə qəbul etdi. Sonralar Muş Alparslan Universitetində fəaliyyətini davam etdirərək tarix yazdı. Burada ilk dəfə Jurnalistika fakültəsini yaratdı, onun ilk dekanı oldu. Eyni zamanda Türk dili və ədəbiyyatı kafedrasına rəhbərlik etdi. Bu, sadəcə bir vəzifə deyil, gələcək nəsillər üçün qoyulan möhkəm təməl idi.
Tamella xanımın ən böyük sərvəti isə yalnız elmi nailiyyətləri deyil. O, tələbələrinin yaddaşında qayğıkeş müəllim, həmkarlarının qəlbində etibarlı dost, yaxınlarının həyatında isə sonsuz mərhəmət və sevgi mənbəyidir.

O, gözəl anadır. İki oğul övladını yüksək təhsilli, vətənə və ailəyə bağlı insanlar kimi böyüdüb. Dörd nəvəsi üçün isə həm müdrik nənə, həm də həyat məktəbidir. Vəfalı həyat yoldaşı olaraq Əli bəyə duyduğu sevgi və ehtiramı hər zaman qürurla dilə gətirir. Qaynanası, qohumları, dostları haqqında yazdığı səmimi fikirlər onun insanlara necə böyük dəyər verdiyini göstərir.
Tamella xanım duyğusal ürəyə sahib insandır. O, sevdiyi insanları tərifləməkdən, onların uğurlarına sevinməkdən, dostlarının, tələbələrinin, həmkarlarının xoş günlərini paylaşmaqdan heç vaxt yorulmur. Onun qələmi sevginin, dostluğun, vəfanın və insanlığın səsini yazır.
Bu gün isə növbə bizdədir...
Əziz Tamella xanım!
Sizin ömrünüz minlərlə tələbənin taleyinə işıq salan bir mayak, yüzlərlə insanın həyatına toxunan bir xeyirxahlıq nümunəsidir. Siz harada yaşamısınızsa, harada çalışmısınızsa, orada Azərbaycanı ləyaqətlə təmsil etmisiniz. Doğma Vətəninizi sevə-sevə vəsf etdiyiniz kimi, uzun illər çalışdığınız Muş şəhərinin, oradakı həmkarlarınızın və tələbələrinizin də sevgisini qazanmağı bacarmısınız.
Qoy Tanrı Sizə sağlam, uzun, bərəkətli ömür nəsib etsin. Həmişə ailənizin, övladlarınızın, nəvələrinizin, dostlarınızın sevgisi ilə əhatə olunasınız. Elminiz, müdrikliyiniz, insanlığınız və səmimiyyətiniz bundan sonra da neçə-neçə nəslə örnək olsun.
75 yaşınız mübarək olsun, dəyərli professor Tamella xanım Əliyeva!
Sizə olan hörmət və sevgimiz illər keçdikcə daha da artsın. Çünki bəzi insanlar ömürlərini sadəcə yaşamırlar – onlar ömürləri ilə tarix yazırlar.
Təbrik edirəm, can sağlığı arzulayıram. Mən sizi çox sevirəm.

Dərin hörmət və məhəbbətlə,
Şəmsiyyə Kərimova.

Əməkdar jurnalist