Stüardessalar hər gün yalnız turbulensiya ilə deyil, eyni zamanda müxtəlif insan xarakterləri ilə də üz-üzə qalırlar. Məlum olub ki, onların ekipaj daxilində başqalarına hiss etdirmədən problemli sərnişin barədə məlumat vermək üçün öz gizli söz sistemi var.

Adının açıqlanmasını istəməyən britaniyalı stüardessa bildirib ki, ekipaj üzvləri arasında qiymətli sözündən şərti kod kimi istifadə olunur. Əgər bu söz sərnişinə aid işlədilirsə, bu o deməkdir ki, həmin şəxs kobud davranır və problem yaradır. Bundan sonra bütün personal kiminlə qarşı-qarşıya olduqlarını anlayır və ünsiyyətini buna uyğun qurur.

Digər bir stüardessa etiraf edib ki, ekipaj arasında “Filip” müraciəti də xəbərdarlıq siqnalı kimi səslənir. Bu ad PILP (Passenger I’d Like to Punch) “vurmaq istədiyim sərnişin” ifadəsinin qısaltmasından yaranıb, lakin zamanla ifadə daha yumşaq formada işlədilməyə başlanıb.

Daha az münaqişəli kodlar da mövcuddur. İki illik təcrübəsi olan bir stüardessanın sözlərinə görə, əgər ekipaj üzvləri sərnişini cazibədar hesab edirlərsə, vidalaşarkən adi “sağ olun” əvəzinə “cheerio” deyə bilirlər. Bu, peşəkar sərhədləri pozmadan edilən, maksimum dərəcədə nəzakətli bir flört üsulu sayılır.

Eyni zamanda stüardessalar sərnişinləri heç vaxt adla çağırmırlar, yalnız oturacaq nömrəsi və fonetik əlifba ilə müraciət edirlər: “50 Delta”, “50 Charlie” və ya “50 Kilo”. Bu üsul daha sürətli, daha dəqiqdir və qarışıqlıq yaratmır.

Bu səbəbdən narahat olmağa əsas yoxdur, əksər hallarda bu sadəcə ekipajın iş dili hesab olunur. Lakin əgər salon daxilində sizi “qiymətli Filip” adlandırdıqlarını eşitsəniz, bəlkə də davranışınıza bir qədər diqqət yetirməyin və üzr istəməyin vaxtıdır.