FIFA-nın 2026-cı il üçün açıqladığı ilk reytinq cədvəlində Azərbaycan milli komandası 127-ci pillədəki mövqeyini qoruyub saxlayıb.

“Qafqazinfo” ali futbol qurumunun rəsmi saytına istinadən xəbər verir ki, yığmamız əvvəlki siyahı ilə müqayisədə irəliləyiş və ya geriləmə qeydə almadan 1132.97 xalla eyni pillədə qərarlaşıb.

Dünya reytinqinin zirvəsində də stabillik müşahidə olunur. Belə ki, İspaniya millisi 1877.18 xalla liderliyini davam etdirir. İlk üçlüyün digər pillələrində isə müvafiq olaraq Argentina (1873.33 xal) və Fransa (1870 xal) yığmaları yer alıblar.

Yanvar reytinqində ən böyük irəliləyişi Afrika Millətlər Kubokunda uğurlu çıxış edən Mərakeş və Seneqal milliləri göstərib. Belə ki, turnirin finalçısı olan Seneqal 7 pillə irəliləyərək dünyanın 12-ci komandası olub, Mərakeş isə 6 pilləlik sıçrayışla ilk onluğa daxil olub.

Qeyd edək ki, növbəti reytinq cədvəlinin mart ayında keçiriləcək yoldaşlıq oyunları və seçmə mərhələ matçlarından sonra yenilənəcəyi gözlənilir.