Almaniya Ukraynaya sülhməramlı kimi hərbi qüvvə göndərməyi planlaşdırmır.

"Turaztv.az" "Unikal" -a istinadən xəbər verir ki, bu barədə Almaniyanın Bild jurnalı məlumat yayıb.


Məlumata görə, Berlin yaxın vaxtlarda Rusiya Prezidenti Vladimir Putin və Ukrayna Prezidenti Vladimir Zelenski arasında görüşün baş tutacağına, həmçinin sülh razılaşmasının əldə olunacağına inanmır.

Hətta razılaşma imzalansa belə, Almaniya hökuməti öhdəliklərini əsasən maliyyə dəstəyi ilə yerinə yetirmək niyyətindədir.

“Rəsmi mənbələrin bildirdiyinə görə, atəşkəsə nəzarət məqsədilə alman əsgərlərinin göndərilməsi ‘növbəti göstərişədək’ gündəmdə deyil. Yalnız ABŞ Prezidenti Donald Tramp konkret addımlar atacağı və Putin təcavüzkar müharibəsini dayandıracağı halda vəziyyət dəyişə bilər. Hazırda isə belə əlamətlər müşahidə olunmur”, – deyə yazıda qeyd olunub.

Bild-in məlumatına əsasən, Almaniya Ukrayna Silahlı Qüvvələrinin gücləndirilməsini davam etdirəcək və hətta ukraynalı hərbçilərin bir hissəsinin maliyyə təminatını da öz üzərinə götürməyi planlaşdırır.

Xatırladaq ki, daha əvvəl Bloomberg xəbər vermişdi: Avropanın 10 ölkəsi Ukrayna ərazisinə öz hərbi kontingentini göndərməyə razılıq verib.