Son illərdə ultra işlənmiş qidalar (çips, qazlı içkilər, hazır yeməklər və s.) sağlamlıq problemlərinin əsas səbəbi kimi göstərilir. Bu qidaların beyni aldadaraq həddindən artıq qidalanmaya səbəb olduğu iddia edilir. Lakin Böyük Britaniyada 3 min nəfərin iştirakı ilə aparılan yeni araşdırma daha mürəkkəb mənzərə ortaya qoyub.

AZƏRTAC “MedicalXpress” portalına istinadla xəbər verir ki, alimlərin qənaətinə görə, insanların bir qidanı nə qədər bəyəndiyi və onu həddən artıq yemək ehtimalı yalnız tərkibindən deyil, həm də onun haqqında təsəvvürlərindən asılıdır. Qidanı “şirin”, “yağlı” və ya “çox emal olunmuş” kimi qəbul etmək faktiki qida dəyərindən asılı olmayaraq, artıq qidalanma ehtimalını artırır. “Ultra emal olunmuş” etiketi isə insanların seçimlərinə çox az təsir göstərir, qida davranışındakı fərqlərin yalnız kiçik hissəsini izah edir.

Tədqiqatçılar bildirirlər ki, bütün ultra işlənmiş qidaları zərərli hesab etmək düzgün deyil. Onların bəziləri, həqiqətən, yüksək kalorili və doyumsuz ola bilər. Amma digərlərinin faydalı olması mümkündür. Məsələn, yaşlılar və ya xüsusi pəhriz saxlayanlar üçün. Mütəxəssislər “Ultra işlənmiş qidalar pisdir” yanaşmasındansa, aşağıdakı tövsiyələrə əməl olunmasını daha faydalı hesab edirlər:

- Qida savadlılığını artırmaq, insanlara doyumluluq və iştahanı tanımağı öyrətmək;

- Yeməkləri yenidən formalaşdırmaq, dadlı və doyurucu məhsullar yaratmaq;

- Psixoloji motivasiyalara diqqət yetirmək, insanların yalnız aclıq deyil, emosional səbəblərlə də qidalanmasını nəzərə almaq.

Mütəxəssislərin fikrincə, sağlam qidalanmanı təşviq etmək üçün qidaları yalnız “emal olunmuş” və ya “təbii” kimi ayırmaq kifayət deyil. Əsas məsələ qidaların dəyəri, dadı və insanlar tərəfindən qəbul edilməsidir.