Dünyada ilk dəfə olaraq insan həyatının əsas quruluş elementlərini sıfırdan yaratmaq məqsədi daşıyan mübahisəli layihəyə start verilib.

AZƏRTAC BBC-yə istinadla xəbər verir ki, Böyük Britaniyanın ən iri tibbi xeyriyyə təşkilatı olan “Wellcome Trust” bu istiqamətdə tədqiqatlara başlamaq üçün ilkin olaraq 10 milyon funt sterlinq maliyyə ayırıb. Təşkilat hesab edir ki, bu layihə müalicəsi mümkün olmayan bir çox xəstəliklər üçün yeni terapiyaların inkişafını sürətləndirərək daha çox fayda gətirə bilər.

Tədqiqatın ilk mərhələsində alimlər getdikcə daha böyük insan DNT blokları yaratmağın yollarını inkişaf etdirməyi planlaşdırırlar. Nəhayət, tamamilə süni yolla hazırlanmış bir insan xromosomu yaratmaq hədəflənir. Xromosomlar insan inkişafını, orqanizmin təmirini və saxlanmasını idarə edən genləri ehtiva edir. Bu süni xromosomlar üzərində aparılacaq tədqiqatlar DNT və genlərin bədənimizdə necə işlədiyini daha yaxşı anlamağa imkan verəcək.

Layihənin iştirakçılarından biri, Kembricdə yerləşən Molekulyar Biologiya üzrə MRC Laboratoriyasının alimi Culian Sale bildirib ki, bu tədqiqat biologiya sahəsində növbəti böyük sıçrayış olacaq: “Sərhəd yoxdur. Biz insan ömrünü sağlam şəkildə uzatmaq, yaşlanma ilə bağlı xəstəlikləri azaltmaq və insan həyatını keyfiyyətli yaşlanma ilə təmin edəcək terapiyalar üzərində işləyirik. Məsələn, zədələnmiş orqanların, qaraciyər, ürək, hətta immun sisteminin regenerasiyası üçün xəstəliyə davamlı hüceyrələr yaratmağı hədəfləyirik”, - deyə o, qeyd edib.

Bu sahədə indiyə qədər tədqiqatlar etik narahatlıqlara, xüsusilə “dizayner körpələr” və gələcək nəsillərdə gözlənilməz genetik dəyişikliklərə yol aça biləcəyi ehtimalına görə tabu hesab olunurdu.