London Kral Kollecinin və Erasmus Universiteti Tibb Mərkəzinin alimlərindən ibarət beynəlxalq tədqiqat komandası göz rənginin müəyyənləşməsində mühüm rol oynayan 50 yeni gen müəyyən edib.

AZƏRTAC xarici mediaya istinadən xəbər verir ki, bu kəşf həkimlərə piqmentar qlaukoma və albinizm kimi göz xəstəliklərində hansı genin nə səviyyədə rol oynadığını aydınlaşdırmağa kömək edəcək.

Tədqiqat qrupu əlavə olaraq Asiya və avropalıların göz rənginin genetik olaraq qəhvəyinin müxtəlif tonları və açıq maviyə meyilli olduğunu müəyyən edib.

Erasmus Universiteti Tibb Mərkəzinin göz xəstəlikləri bölməsinin alimləri qəhvəyi və mavi göz rəngləri arasında yalnız iki genin rol oynadığını müəyyənləşdiriblər. London Kral Kollecindən həkim Pirro Hysi bu haqda deyir: “Bu, olduqca həyəcanverici kəşfdir, çünki bizə insan cizgilərinin nəsillər boyunca necə inkişaf etdiyini müəyyənləşdirməyə kömək edir”.