Uzun illərdən bəri, ilk dəfədir ki, Bakıya, eləcə də Vətənimizin bütün bölgələrinə güclü qar yağır və Biz arzusunda olduğumuz əsil qış həyatını yaşayırıq. El arasında qar yağması, xeyir-bərəkət müjdəsi adlandırılır. Qar həm də, virus infeksiyasının patogenlik və mutatik fəallığının süstləşməsi, reqressiv dönəmə qayıdışını şərtləndirən əsas təbiət hadisəsidir.
Tədqiqatlar virusların yüksək patogenlik və yoluxduruculuq əmsalını saxlanmasının həlledici şərtinin ətraf temperaturun -10 dərəcədən +10 dərəcə intervalında olduğunu təsdiq edir. -20 dərəcədən aşağı temperaturda isə, viral fəallıqda kəskin süstlük və respirator infeksiyaların statistik olaraq yüksək faiz nisbətində azalması da öz təsdiqini tapıb. Əslində, virusların aktivlik fəallığını xarakterizə edən bu temperatur intervalı, ekvatordan şimal qütbünə qədər olan məsafənin son 1/3 bölümündə olan yaşayış massivi və ölkə əraziləri üçün xarakterikdir.
Ekvatora yaxın və ilk 2/3 məsafədə olan ərazilərdə (o cümlədən, Bizim ölkəmizdə) viruslarda susqunluq və nisbi inaktivlik, zaman və məlum məkan fərqliliyinə görə, -1 dərəcədən -5 dərəcə temperatur intervalında baş verməlidir və baş verir. Odur ki, qarla müşahidə olunan temperaturun hazırki enişi, istər viral, istərsə də yuxarı tənəffüs yolu infeksiyaların xüsusən uşaqlar arasında kəskin azalmasına səbəb olacaqdır.

Digər tərəfdən, qarla müşahidə olunan məlum temperatur fərqliliyi, ətraf mühitin havasında nicbi quruluğa səbəb olmaqla, aerozol şəkillı rütubətin əmələ gəlməsinin qarşısını aldığından, hava-damcı infeksiyalarına yoluxma risqini kəskin şəkildə aşağı salmalıdır.
Qarla müşahidə olunan soyuq hava şəraitində həm də insanlar evdə- ailə mühütündə qalmağı üstün tutduğundan, ictimai yerlərə toplaşmaq və yaxın kontakt minimuma enir ki, bu da viral infeksiyalara yoluxma riskini kəskin dərəcədə azaldır.
Virus infeksiyalarına yoluxma prodromal dövrünün sonu, xüsusən aktiv klinik əlamətlərin sürəkli olduğu müddətdə (əsasən, 3-5 gün) baş verdiyindən, məlum qarlı hava şəraiti bu müddətə davam edərsə, ekvatordan söylədiyim məsafə fərqliliyi olan yerlərdə hətta epidemik vəziyyətdə olan viral infeksiyaların sporodikləşməsi belə mümkündür.

Odur ki, nə qədər çətinliklər gətirsə də, ölkəmizin bütün ərazilərinin hazırda qalın qar örtüyünə bürünməsini, təbiətin xalqımıza böyük lütfi bilib, bu təbiət hadisəsinə sevinməliyik.
Azərbaycanımızı bürüyən bu ilk qarınız mübarək olsun.
Xəstəliklərdən uzaq, sağlam, gümrah və xoşbəxt həyat yaşayın.