Arzu Yaqub qızı : İgidlik yolu

Xəbərlər

16.02.2025, 01:05

Arzu Yaqub qızı : İgidlik yolu - FOTO

Uşaqlıqdan valideynlərini itirib, valideyn nəvazişi görməyən, özündən sonra nişanəsi qalmayan ,Ağdam , Laçın , Kəlbəcərdə döyüşlərdə yoldaşları ilə çiyin- çiyinə rəşadət göstərən,Kəlbəcərin Yanşaq kəndində çoxsaylı güllə yaraları nəticəsində həlak olub şəhidlik zirvəsinə ucalan, I Qarabağ Müharibəsi şəhidimiz Məmmədov Adil Xanlar oğluna həsr olunur. Məkanın cənnət olsun şəhidimiz...

İgidlik yolu

Bu yoldan oğullar keçdi,
Adı igidlik yoludur.
Vətənə, torpağa, xalqa,
Elə məhəbbət yoludur.

İşıq saçdı Vətən sevgin,
Bəlkə qəmgin taleyinə.
Saçını oxşadı elin,
Ata- ana oldu sənə.

Yağılar qənim kəsildi,
Ana yurdun torpağına.
I haqq savaşında
Sən sarıldın silahına.

Laçından, Ağdamdan keçib,
Əzdin yağının başını.
Qanlı - qadalı döyüşdə
İtirdin çox yoldaşını.

5- ci Bərdə taboru...
Çox cəsurlar keçdi candan.
Onlar bir tarix yazdılar,
Bu tarixdə sən də varsan.

Ölümlərdən döndün Adil,
Sınmadı əzmin , iradən.
Həmişə getdin irəli,
Həmlələrə dözdü sinən.

Kəlbəcərdə çətin yollar,
Qızışdı qanlı döyüşlər.
Şəhidim sənin ömründə
Bir də açılmadı səhər.

Neçə- neçə oğullar tək,
Torpaq üçün keçdin candan.
30 illik həsrətinə
Zəfər yazdı Azərbaycan

Yenə o dağda, dərədə,
Açacaq güllər, çiçəklər.
Cənnət qoxulu şəhidim,
Səni unutmaz ürəklər.

Gör nə qədər doğman vardır,
Oğul dedi sənə torpaq.
Ölümə yenilməz şəhid
Vətən sevdan yaşayacaq,
Torpaq eşqin yaşayacaq!