Xəbərlər
21.09.2026, 22:05
Əzizə Ağahüseynqızı : MƏN ŞEİR DEMƏYƏ QAÇIB GƏLMİŞƏM - FOTO
Dünyaya gəlməyim başıma qınaq,
Bu ömür savaşdı,bu ömür sınaq,
Dərdin təpəsindən aşıb gəlmişəm,
Mən şeir deməyə qaçıb gəlmişəm.
Qazanda soğançam yarımçıq qalıb,
Süfrəm yığılmayıb, yer açıq qalıb,
Qabım yuyulmayıb bulaşıq qalıb,
Ulduz tək göylərdə saçıb gəlmişəm,
Mən şeir deməyə qaçıb gəlmişəm.
Bir ucu qaranlıq,biri xeyirdi,
Başımdan ağlımı alıb çevirdi,
Bu söz möcüzədi, bu söz sehrdi,
Düşüb axarına uçub gəlmişəm,
Mən şeir deməyə qaçıb gəlmişəm.
Ömrümü yaşadan rişədi, candı,
Qanımda oynayan dəlisov qandı,
Məni özüm kimi duyan adamdı,
İnanıb könlümü açıb gəlmişəm,
Mən şeir deməyə qaçıb gəlmişəm.
Ətəyi quzqulaq, yarpız, nanəli,
Sinəsi qəmindən dərdli, naləli,
Gecəsi, gündüzü qəm şəlaləli,
Bulaq tək qaynayıb, daşıb gəlmişəm,
Mən şeir deməyə qaçıb gəlmişəm.
Tanrım özü seçdi, qismət, baxt verdi,
Sözümü deməyə özəl taxt verdi,
Şeirimi yazmağa azca vaxt verdi,
Tələsdim yollarda şaşıb gəlmişəm,
Mən şeir deməyə qaçıb gəlmişəm.
Son xəbərlər
Ən çox oxunanlar
- Bu gün
- Bu həftə
- Bu ay
