Arzu Yaqub qızı : Vətən var - FOTO

Xəbərlər

7.12.2024, 22:40

Arzu Yaqub qızı : Vətən var - FOTO

Vətən var

Vətən Müharibəsi şəhidimiz Təbriz Həsənova və bütün şəhidlərimizə həsr olunur.Allah şəhidlərimizə rəhmət eləsin

Sıxılıb ömrünün acılarına,
Dərdlərin rəsmini çəkən qadınsan.
Gecələr yuxusuz, səhərlər dalğın,
Məzara nisgillər əkən qadınsan.

Arzular, ümidlər qaldı gözündə,
Qəmin budağında açan çiçəksən.
Dünyaya mərd oğul gətirən ana,
Şəhid anasısan , sən bir mələksən.

Bir vaxtlar qayğısın çəkdin balanın,
Təbrizin şəkli də nurdu gözünə.
Yanırıq, sənintək yana bilmərik,
Qulaqların həsrət " ana" sözünə.

Bir gəlin gözləri yol çəkir indi,
Ömür - gün yoldaşı getmir gözündən.
Övladları 'ata, ata " deyəndə,
Çarəsizlik yağır qəlbi,üzündən.

Yaxır ürəyini sağalmaz yara,
Baxır uşaqlara yanır, əriyir.
Ona təsəllidir ərinin ruhu,
Məzarı başında susur, kiriyir.

Bir oğul vermisən anam Vətənə,
Əzmin itirmədi, getdi irəli.
Düşmənin gözünə ox oldu Təbriz,
Əsla unudulmaz Vətən əsgəri.

Daim düşmənlərin əzdi başını,
Qorxmadı ölümdən, qorxmadı qandan.
Bir şəhid yerinə mini dirildi,
Xalqımız sarsılmaz , eşitsin cahan!

Ay anam , ay bacım ağlamayın siz,
Vətən oğulları ölümsüz hər an.
Şəhid övladının qəlbində qürur,
Zəfər sözü qopur dodaqlarından.

Bacım düşünmə ki, bəxtin yaralı,
Anam ürəyini almasın qubar.
Şəhidlər ölməzdir , yaşayır inan,
Harda ki şəhid var, orda Vətən var!