İran İslam İnqilabı Keşikçiləri Korpusu (SEPAH) ABŞ ilə uzunmüddətli müharibəyə hazır olduğunu bəyan edib.

AZƏRTAC-ın “Mehr” xəbər agentliyinə istinadla məlumatına görə, bunu SEPAH-ın sözçüsü, briqada generalı Hüseyn Möhebbi bildirib.

“Müharibə davam edir və SEPAH uzunmüddətli müharibəyə hazırlaşıb. Əvvəllər də hazırlıqlı idik, indi isə daha da hazırıq”, - deyə o qeyd edib.

Möhebbi ABŞ-nin bölgədəki hərbi bazalarının və kəşfiyyat obyektlərinin zəif olduğunu iddia edib və Vaşinqtonun regional təsirinin azaldığını bildirib.

İran ordusunun komandanı general-mayor Əmir Hatəmi də daha əvvəl ölkə silahlı qüvvələrinin ABŞ və İsrail tərəfindən mümkün yeni hücumların qarşısını almağa hazır olduğunu açıqlayıb.

Qeyd edək ki, bu açıqlamalar ABŞ-nin İrana qarşı yeni hərbi əməliyyat keçirə biləcəyi ilə bağlı Yaxın Şərqdə narahatlığın artdığı bir vaxtda səslənib. ABŞ Prezidenti Donald Tramp isə İranla bağlı müxtəlif variantları nəzərdən keçirdiyini bildirib.