ADA Universitetinin İxtisasartırma Proqramı 2025-ci ilin ilk təlim proqramına Azərbaycan Respublikası Mərkəzi Bankı ilə start verib.

Turaztv.az AZƏRTAC-a istinadən xəbər verir ki, ADA Universitetində Mərkəzi Bankın rəhbər heyətinin növbəti qrupu üçün "Liderlik səriştələri üzrə təlim proqramı"nın açılış mərasimi keçirilib.

Açılışda akademik işlər üzrə prorektor Elkin Nurməmmədov və onun müşaviri Aygün Hacıyeva, eləcə də Mərkəzi Bankın sədrinin müavinləri Gülər Paşayeva, Əli Əhmədov və baş direktoru Fuad İsayev çıxış ediblər.

Çıxışçılar vurğulayıblar ki, sürətlə dəyişən iş mühitinin tələblərinə uyğunlaşmaq peşəkar mühitdə çevik, strateji, nəticəyönümlü yanaşmanı və daimi öyrənməni iş prosesinin bir hissəsinə çevirməyi tələb edir. Bu baxımdan, hərtərəfli tədris proqramlarına və müasir təlim metodlarına malik olan ADA Universiteti peşəkarların akademik və qeyri-akademik müstəvidə inkişafını dəstəkləyir.

Qeyd edilib ki, proqramın bu il də davam etdirilməsi onun əməkdaşların inkişafına qatdığı əlavə dəyərdən, təlim-tədris metodologiyasının keyfiyyətindən və komanda üzvlərinin ortaq və fərqli fikirlərini bölüşmələri üçün əlverişli platforma təqdim etməsindən xəbər verir.

Əlavə edilib ki, İxtisasartırma Proqramı vasitəsilə yerli və xarici peşəkarları, dövlət və özəl sektor nümayəndələrini bir araya gətirən ADA Universiteti həm ölkəmizdə gedən müxtəlifyönlü islahatları dəstəkləyir, həm də beynəlxalq ekspertlərin uğurlu təcrübələrini bizimlə bölüşmələri üçün əməkdaşlıq və təcrübə mübadiləsini təmin edir.

Qeyd edək ki, ötən il 44 nəfər iştirakçı ilə başlayan sözügedən proqram bu ilin may ayınadək ümumilikdə 75 nəfər əməkdaşı əhatə edəcək.

Onlar beyin fırtınası, real hadisə analizləri və simulyasiyalarda iştirak edəcəklər. 9 modul üzrə 54 saatadək tədris müddətini əhatə edəcək proqram zamanı iştirakçılar liderlik bacarıqlarının inkişafı, biznes etikası, emosional zəka, liderlik kommunikasiyası, proseslərin idarəolunması, qərar qəbulu, dəyişikliklərin idarəolunması, böhran vəziyyətlərinin idarəolunması və böhran kommunikasiyası və strateji idarəetmə kimi mövzularda bilik və bacarıqlarını artıracaqlar.