Xəbər verdiyimiz kimi, hakim “Gürcü Arzusu” partiyasının namizədi Mixeil Kavelaşvili Gürcüstanın altıncı prezidenti seçilib.

"Turaztv.az" “Qafqazinfo”-ya istinadən Gürcüstanın yeni liderinin tərcümeyi-halını təqdim edir:

Kavelaşvili 22 iyul 1971-ci ildə Bolnisi şəhərində anadan olub. Kiçik yaşlarından futbola olan marağı onun yolunu yaşıl meydanlarla kəsişdirib.

Peşəkar futbolçu kimi karyerasında 1989-cu ildə Tbilisi “Dinamo”sunda başlayıb.

1991-2002-ci illərdə Gürcüstan millisinin heyətində 46 oyunda iştirak edib və aktivinə 9 qol yazdırıb.

Bacarıqlı hücumçu, 1995-ci ildə Rusiyanın “Spartak Vladiqafqaz” klubunda özünü təsdiqləyib.

1996-cı il martında isə İngiltərənin “Mançester Siti” klubuna transfer olunub.

Bu klubda debüt oyunu həmin ilin aprelin 6-da “Mançester Yunayted”lə derbi matçına təsadüf edib. Həmin matçda adını tabloya yazırmağa da nail olub.

“Mançester Siti” aşağı liqaya düşdükdən sonra o, Futbol Liqasının Birinci Divizionunda 24 oyuna 2 qolla yadda qalıb. Bu göstərici onun müqaviləsinin yenilənməsinə kifayət etmədiyi üçün 1998-ci ildə İsveçrə “Grasshoppers” klubuna icarəyə göndərilib.

Kavelaşvili burada 1997-98-ci il mövsümündə ölkə çempionluğunu qazanıb.

Sonralar İsveçrənin “Sürix” və “Lütsern” də daxil olmaqla bir neçə klubunda çıxış edib.

2005-2006-cı illərdə İsveçrə “Bazel”ində çıxış edib və bu da onun peşəkar futbolçu karyerasının son klubu olub.

2009-cu ildə Gürcüstanda Beynəlxalq Peşəkar Futbolçular Federasiyasını təsis edib. Hazırda həmin federasiyanın fəxri prezidentidir.

Siyasi karyerasına isə ilk dəfə 2016-cı ildə başlayıb.

Bu zaman “Gürcü Arzusu” partiyasından Gürcüstan parlamentinə deputat seçilib. O, 2022-ci ildə “Gürcü Arzusu”ndan ayrılıb və “Xalq Gücü” partiyasının həmtəsisçisi olub.

2024-cü ildə dekabrın 14-nə təyin edilmiş seçkilərdə “Gürcü Arzusu” tərəfindən Gürcüstanın prezidentliyinə namizəd kimi Kavelaşvilinin adı irəli sürülüb.

Bu gün isə 300 səsdən 224-nü toplayaraq Gürcüstanın altıncı prezidenti seçilib.

Qeyd edək ki, Gürcüstanın ümümxalq sərverməsi olmadan seçiilən ilk liderinin andiçmə mərasimi dekabrın 29-da olacaq.

Qeyd edək ki, “Gürcü Arzusu” partiyasının baş katibi, mer, Kaxa Kaladze də vaxtilə yaşıl meydanlarda çıxış edib. O, İtaliya nəhənglərindən “Milan”da çıxışı ilə məşhurlaşıb.

Hazırladı: Telli Minbir