Türkiyənin xarici işlər naziri Hakan Fidan bir sıra ölkələrin dövlət rəsmiləri ilə Suriyadakı son vəziyyəti müzakirə edib.

Turaztv.az AZƏRTAC-a istinadən xəbər verir ki, bu məqsədlə Türkiyənin XİN başçısı ilə Avropa İttifaqının xarici işlər və təhlükəsizlik siyasəti üzrə ali nümayəndəsi Kaja Kallas, İtaliya Baş nazirinin müavini, xarici işlər və beynəlxalq əməkdaşlıq naziri Antonio Tayani, Fransa Senatının Xarici işlər, müdafiə və silahlı qüvvələr komitəsində ölkənin xarici işlər naziri Jan-Noel Baro, İspaniya Krallığının xarici işlər, Avropa İttifaqı və əməkdaşlıq naziri Xose Manuel Albares Bueno, Çex Respublikasının xarici işlər naziri Yan Lipavski, Pakistanın Baş nazirinin müavini və xarici işlər naziri Məhəmməd İshaq Dar arasında telefon danışıqları olub.

Danışıqlar zamanı Suriyanın ərazi bütövlüyü və siyasi birliyinin əhəmiyyəti, keçid dövrünün nizamlı olması, bu dövr ərzində ölkədəki dini azlıqların qorunması, eləcə də terror qruplaşmalarının yaranan vəziyyətdən istifadə etməsinin qarşısının alınması məqsədilə beynəlxalq ictimaiyyətin xalqa dəstək verməsinin zəruriliyi vurğulanıb.

Hakan Fidan danışıqlar zamanı Suriyanın ərazi bütövlüyü və siyasi birliyi çərçivəsində sabitlik və sülhün təsis edilməsinin vacibliyini qeyd edib.