Bu gün tibb sahəsində əldə olunan uğur hər birimizi sevindirir. Axı, həyatda insana hər şeydən öncə sağlamlıq əsasdır. Ona görə də deyiblər ki, sağlam bədəndə sağlam ruh olar.
Cəmiyyətimizin sağlamlığı keşiyində fədakarcasına çalışan, Hippokrat andına sadiq qalan, sevib-seçdiyi peşəsi ilə fəxrimiz olan həkimlərimiz çoxdur. Onların hər biri xəstəyə doğma münasibət bəsləməklə onlara həyat verir və onların doğmalarının, yaxınlarının sevincinə şərik olurlar. Hər bir həkim də yaxşı bilir ki, ona məsuliyyətli və şərəfli bir iş - insan taleyi tapşırılıb. Ona görə də həkim ona göstərilən etimadı layiqincə doğrultmaq üçün qollarını çırmayıb işə başlayır, elə ilk gündən peşəkar bir həkim kimi xalqın dərin hörmətini qazanmaq üçün əlindən gələnləri etməyə başlayır. Qədirbilən xalqımız da təcrübəli həkimə böyük hörmət və izzətlə müraciət edir və dərdlərinə çarə tapır, yalnız bundan sonra həkimin ünvanına xoş sözlər söyləyirlər.
Bu gün ölkəmizin hər bir guşəsində belə əhalinin sağlamlığı naminə ölkə rəhbərliyi tərəfindən diqqət və qayğı yüksək səviyyədədir. İnsan sağlamlığı naminə həkimlik peşəsi ilə ülfət bağlayan təcrübəli həkimlərimiz çoxdur. Onlardan biri də Respublika Klinik Xəstəxanasının kardioloq-həkimi Fərqanə xanım Mahmudovadır.

Səhhətimlə bağlı bu tibb müəssisəsində tez-tez oluram. Oktyabrın 15-də müayinəyə getmişdim. Məni qəbul edən Fərqanə xanım vəziyyətin ağır olduğunu bildirib təcili ürəkdə əməliyyat (anji) aparılmasını təkidlə bildirdi və məni “Kəpəz” hospitalına göndərdi. Hospitalda həqiqətən əməliyyatın vacib olduğunu vurğuladılar. Hətta mənə evə getməyə, libasımı dəyişdirməyə belə icazə vermədilər. Mən əməliyyat stoluna əyləşənədək evdəkilər – ailə üzvlərim başımın üstünü aldılar.

Hospitalın baş həkimi Nemət Bəşirov məni əməliyyat stoluna uzadanda ürək-dirək verdi, hər şeyin yaxşı olacağına ümidləndirdi. Və dediyi kimi də oldu. Əməliyyat uğurla başa çatdı. Palataya keçiriləndə isə həkimin yazdığı prosedurları baş tibb bacısı Zülfiyyə Çələbiyevaya həvalə edilmişdi. Onun səmimiyyəti, mehribanlığı, canıyananlığı hər bir tibb işçisinə əsl nümunədir.

Budur, mən artıq həyatdayam. Bu gün dostlarımın arasında, ailəmin yanındayam. Mənə ikinci ömür bəxş etmiş Fərqanə Mahmudovaya, Nemət Bəşirova, Zülfiyyə Çələbiyevaya, hər iki səhiyyə ocağının heyətinə dərin təşəkkürümü bildirirəm.

Cəmil Dadaşov,
“Ədalət və həqiqət” qəzetinin baş redaktoru,
“Turaz.tv” saytının rəhbəri