“Dahi Azərbaycan şairi və mütəfəkkiri Nizami Gəncəvi irsinin dünyada tədqiqi və təbliği məqsədilə Türkiyədəki səfirliyimizin nəzdindəki Azərbaycan Mədəniyyət Mərkəzi olaraq şairin “Xəmsə”sinin bütövlükdə türk dilinə tərcüməsini həyata keçiririk. Layihə çərçivəsində “Xəmsə”yə daxil olan bütün əsərlərin orijinaldan, yəni farscadan türk dilinə tərcüməsi və nəşri nəzərdə tutulub. Bununla yanaşı, Azərbaycan Mədəniyyət Mərkəzi Nizami Gəncəvi əsərlərinə Türkiyədə türk dilində böyük tələbatın olduğunu nəzərə alaraq, 2022-ci ildə türkcəyə tərcümə edilən “İskəndərnamə” əsərinin də “Xəmsə”yə daxil edilərək yeni buraxılışda nəşrini planlaşdırır. Bundan əlavə Azərbaycan xalq nağılları və klassiklərimizin əsərləri də türk dilinə tərcümə olunur”.

Bu barədə AZƏRTAC-a müsahibəsində Türkiyədəki səfirliyimizin nəzdindəki Azərbaycan Mədəniyyət Mərkəzinin direktoru Samir Abbasov bildirib.

Mərkəzin rəhbəri deyib ki, Azərbaycan noyabr ayında həm İstanbulda, həm də Ankarada keçiriləcək beynəlxalq kitab sərgilərində fəxri qonaq qismində iştirak edəcək: “Bundan əlavə səfirliyimizin nəzdində Azərbaycan Mədəniyyət Mərkəzinin yaradılması münasibətilə xüsusi hazırlanan Azərbaycan stendi Ankarada keçiriləcək kitab sərgi-yarmarkasında ziyarətçilərə təqdim ediləcək. Tədbirdə nəşriyyatlarımızın tanıdılması ilə yanaşı, yazıçılarımızla görüşlərin keçirilməsini də planlaşdırırıq”.

Azərbaycan Mədəniyyət Mərkəzi tərəfindən kitab və kitabxana sahəsində Türkiyədə bir çox layihənin reallaşdırılmasının nəzərdə tutulduğunu qeyd edən Samir Abbasov onlardan birinin də “Azərbaycanı tanıyaq” başlığı altında keçiriləcəyini deyib: “Layihə çərçivəsində Azərbaycan tarixi və mədəniyyətinin Türkiyənin hər bölgəsində tanıdılması nəzərdə tutulur. Ölkəmizi türkiyəli qardaşlarımıza daha da yaxından tanıtmaq məqsədilə Türkiyənin çoxsaylı aparıcı kitabxanalarına Vətənimizə dair zəngin kitab kolleksiyaları hədiyyə ediləcək, milli mədəniyyətimiz geniş təbliğ olunacaq”.