Dekabrın 18-də Sumqayıtdakı 28 May Mədəniyyət evində “Heydər Əliyev İli” çərçivəsində təşkil olunmuş yaradıcılıq festivallarının, müxtəlif nominasiyalar üzrə müsabiqələrin və idman yarışlarının qaliblərinin mükafatlandırılması mərasimi keçirilib.

Turaztv.az AZƏRTAC-a istinadən xəbər verir ki, tədbir Ümummilli Lider Heydər Əliyevin və şəhidlərin xatirəsinin bir dəqiqəlik sükutla yad edilməsi ilə başlayıb. Sonra Azərbaycan Respublikasının Dövlət Himni səsləndirilib.

Çıxışlarda Heydər Əliyevin öz xalqını zamanın mürəkkəb tarixi-siyasi sınaqlarından uğurla çıxarmış və ardıcıl mübarizə apararaq onu müstəqilliyə qovuşdurmuş qüdrətli şəxsiyyət olduğu bildirilib. Qeyd olunub ki, böyük siyasi iradəyə, sarsılmaz əqidəyə malik olan Heydər Əliyev bütün varlığı ilə sevdiyi və canından əziz bildiyi doğma xalqının mənafelərini daim önə çəkib və respublikamızın inkişafı üçün malik olduğu bütün imkanlardan istifadə edib.

Sonra yaradıcılıq festivallarının, müxtəlif nominasiyalar üzrə müsabiqələrin və idman yarışlarının qaliblərinə mükafatlar təqdim olunub.

Tədbir Ümummilli Lider Heydər Əliyevin 100 illik yubileyinə həsr olunmuş geniş konsert proqramı ilə davam edib.