QARŞIDAN 31 DEKABR-DÜNYA AZƏRBAYCANLILARIN HƏMRƏYLİK GÜNÜ GƏLİR

Xəbərlər / Nesr

30.11.2022, 20:35

QARŞIDAN 31 DEKABR-DÜNYA AZƏRBAYCANLILARIN HƏMRƏYLİK GÜNÜ GƏLİR

31 DEKABR-DÜNYA AZƏRBAYCANLILARIN HƏMRƏYLİK GÜNÜ

Azərbaycan çox çətin yollardan keçmiş, buna baxmayaraq müstəqilliyini qoruyub indiyə kimi saxlamışdır. Daim düşmənlərlə mübarizə aparmış, onlara öz əzmini göstərmişdir. Bu gün var olmasının, bütöv səslənməsinin əsl səbəbi xalqımızın birliyidir. Düşmənlər nə qədər parçalamağa, ayırmağa çalışsalar da buna nail ola bilməmişlər.
Elə tarixlər vardır ki, onlar Azərbaycanın həyatında mühüm rol oynayıb. 31 dekabrı buna misal göstərmək olar.
31 dekabr- Dünya Azərbaycanlılarının Həmrəylik günü olaraq qeyd olunur. Bu tarix Azərbaycan xalqının yadda qalan günlərindən biridir. 1989-cu ildə Azərbaycanın Naxçıvan Muxtar Respublikası ilə İranın Azərbaycan sərhədinin dağıdılması ilə bu gün əsası qoyulub.
Həmin ilin soyuq, şaxtalı qış günündə minlərlə soydaşımız tarixin ədalətsiz hökmünə- təxminən 200 il bundan əvvəl bağlanmış 1813- cü il Gülüstan və 1828-ci il Türkmənçay sülh müqavilələrinin şərtlərinə etiraz əlaməti olaraq Araz çayının sahilinə toplaşdılar, doğma Azərbaycanı ikiyə bölən tikanlı məftilləri dağıtdılar. Beləliklə, 31 dekabr Azərbaycan tarixinə Milli Həmrəylik Günü kimi daxil oldu. Rəsmi olaraq isə 1991-ci ilin 16 dekabrında Naxçıvan Muxtar Respublikası Ali Məclisinin sədri Heydər Əliyev dünya azərbaycanlılarının birliyini yaratmağın əhəmiyyətini nəzərə alaraq dekabrın 31-ni Dünya Azərbaycanlılarının Həmrəylik Günü elan etdi. Bu barədə Naxçıvan Muxtar Respublikasının Ali Məclisi 6 bənddən ibarət qərar qəbul etdi. Qərarda belə qeyd olunurdu:
1.31 dekabr Dünya azərbaycanlılarının həmrəylik və birlik günü elan olunsun və hər il qeyd edilsin.
2.Həmin gün Naxçıvan Muxtar Respublikası ərazisində iş günü hesab edilməsin.
3. 31 dekabrın Dünya azərbaycanlılarının həmrəylik və birlik günü kimi bütün Azərbaycan Respublikasında rəsmi qeyd edilməsi üçün qanunvericilik təşəbbüsü qaydasında Azərbaycan Respublikasının Ali Sovetinə təklif edilsin.
4. Naxçıvan Muxtar Respublikasının şəhər və rayon məclislərinə tapşırılsın ki, bayram günləri demokratik təşkilatların iştirakı ilə təntənəli mərasimlər hazırlayıb, həyata keçirsinlər.
5. Akademik Yusif Məmmədəliyev adına Naxçıvan Dövlət Universitetinə, Azərbaycan Milli Elmlər Akademiyasının Naxçıvan şöbəsinə, Azərbaycan Yazıçılar Birliyinin Naxçıvan vilayət şöbəsinə, Xalq Təhsili Nazirliyinə tapşırılsın ki, 31 dekabr Dünya azərbaycanlılarının həmrəylik və birlik gününə həsr olunmuş elmi konfrans keçirsinlər.
6.Sərhəd çəpərlərinin bərpa edilməsi qanunsuz hesab edilsin və istehkam qurğularının ləğv edilməsini təmin etmək üçün deputat komissiyası yaradılsın.
Bu bayram ayrı-ayrı ölkələrdə yaşayan azərbaycanlılarla əlaqələr qurmaq, onlar arasında birlik və həmrəylik yaratmaq işində mühüm rol oynayır.
Həmrəylik günü bayramı dünyanın 70-dən çox ölkəsində azərbaycanlılar tərəfindən qeyd olunur. 31 dekabr Azərbaycan üçün mühüm bayramdır, hətta yeni il belə ikinci plana keçib. Həmrəylik günü birləşməyin simvolik rəmzidir. Bu rəmzə uyğun olaraq Azərbaycan xalqı ikinci Qarabağ müharibəsində təkcə düşmənə deyil, bütün dünyaya həmrəy olduğunu sübut etdi. Prezident İlham Əliyevin uzaq görən siyasəti,ordumuzun dəmir iradəsi, xalqımızın bir yumruq altında birləşməsi nəticəsində " Dəmir Yumruq " siyasətini layiqincə yerinə yetirdik. Nəticədə qələbə çaldıq.

NİGAR İMAN
BAKI DÖVLƏT UNİVERSİTETİNİN JURNALİSTİKA FAKÜLTƏSİNİN III KURS TƏLƏBƏSİ