Sentyabrın 15-də Bolqarıstanın paytaxtı Sofiyada açıq səma altında “Azərbaycanın mədəniyyət paytaxtı – Şuşa şəhəri” adlı fotosərginin açılışı olub. Fotosərgi “Şuşa İli” çərçivəsində Sofiya şəhərinin mərkəzi parkında Azərbaycanın Bolqarıstandakı səfirliyi və Sofiya şəhər bələdiyyəsi tərəfindən birgə təşkil edilib.

Səfirlikdən AZƏRTAC-a bildiriblər ki, sərgidə tarixi, mədəni və strateji əhəmiyyətə malik, Qarabağımızın tacı adlandırılan Şuşa şəhərinin füsunkar təbiəti, zəngin mədəniyyət və incəsənət nümunələrini əks etdirən fotolar nümayiş olunub.

Sərginin açılışında Bolqarıstanda akkreditə olunan diplomatik korpusun rəhbərləri, yerli rəsmilər və media nümayəndələri iştirak ediblər.

Tədbirin açılışında çıxış edən səfir Hüseyn Hüseynov Şuşanın tarixi barədə məlumat verərək, sərginin bu gözəl şəhərin Qarabağ xanlığının rəhbəri Pənahəli xan tərəfindən əsasının qoyulmasının 270-ci ildönümünə təsadüf etdiyini bildirib. Diplomat uzun illər Ermənistanın işğalına və dağıntılara məruz qalmış Şuşanın 2020-ci ildə azad edilməsindən sonra Azərbaycanın bu şəhəri yenidən dirçəltmək üçün böyük işlər gördüyünü, Prezident İlham Əliyevin 2022-ci ili ölkəmizdə “Şuşa İli” elan etdiyini söyləyib. H.Hüseynov Şuşa şəhərinin Azərbaycan mədəniyyəti və musiqisinin beşiyi kimi xalqımızın həyatında əvəzsiz yerə malik olduğunu deyib.

Şəhər sakinləri və qonaqlarının böyük marağına səbəb olan “Azərbaycanın mədəniyyət paytaxtı – Şuşa şəhəri” sərgisi iki həftə davam edəcək.