İyunun 7-də Dini Qurumlarla İş üzrə Dövlət Komitəsinin (DQİDK) İmişli bölgəsi üzrə şöbəsi, Sabirabad Rayon İcra Hakimiyyəti (RİH) və Qafqaz Müsəlmanları İdarəsinin (QMİ) Sabirabad rayonu üzrə nümayəndəliyinin birgə təşkilatçılığı ilə “İslam dininə aid ibadət yerlərinə və ziyarətgahlara din xadiminin təyin olunması, attestasiyası və tutduğu vəzifədən azad edilməsi Qaydası”na həsr olunmuş görüş keçirilib. Görüşdə DQİDK-nın şöbə müdiri Cavanşir Bəhrəmov, Sabirabad RİH başçısı Aparatının dini qurumlardan məsul şəxsi Əliabbas Həsənov, QMİ-nin səlahiyyətli nümayəndəsi Ağakərim Sadıqov, rayonda fəaliyyət göstərən din xadimləri və din xadimi olmaq istəyən şəxslər iştirak ediblər.

AZƏRTAC Komitənin saytına istinadla xəbər verir ki, bu qəbildən digər maarifləndirici görüş DQİDK-nın Yevlax bölgəsi üzrə şöbəsinin təşkilatçılığı və şöbə müdiri Natiq Əfəndiyev, Bərdə Rayon İcra Hakimiyyəti aparatının İctimai-siyasi və humanitar məsələlər şöbəsinin nümayəndəsi Asif Abbasov, Mədəni irsin qorunması inkişafı və bərpası üzrə Dövlət xidmətinin əməkdaşları, din xadimləri, dini icma sədrləri, eləcə də din xadimi olmaq istəyən namizədlərin iştirakı ilə Bərdədə keçirilib.

Komitənin Lənkəran bölgəsi üzrə şöbəsinin təşkilatçılığı ilə Astara rayonu Şüvi kəndi “Cümə” məscidində təşkil edilən görüşdə isə şöbə müdiri Qağayı Məmmədov, Astara Rayon İcra Hakimiyyətinin (RİH) başçısı Aparatının İctimai-siyasi və humanitar məsələlər şöbəsinin müdir müavini-dini qurumlarla işin təşkilatçısı Mərasim Hacıyev, din xadimləri, din xadimi olmaq istəyən şəxslər və dini icmanın üzvləri iştirak ediblər.

Təşkil edilən görüşlərdə İslam dininə aid ibadət yerlərinə və ziyarətgahlara din xadiminin təyin olunması, attestasiyası və tutduğu vəzifədən azad edilməsi qaydaları, din xadiminin təyin edilməsi məqsədilə müsahibə elanının verilməsi ilə bağlı təşkilati məsələlər izah edilib, müsahibə komissiyasının tərkibinin formalaşdırılması, reqlamenti və müsahibənin keçirilməsi qaydası iştirakçıların diqqətinə çatdırılıb. Həmçinin namizədin vəzifəyə uyğunluğunun qiymətləndirilməsi, din xadimlərinin attestasiyasının keçirilməsi və attestasiyanın nəticələrinin rəsmiləşdirilməsi barəsində izahlar verilib. Din xadimi olmaq istəyən şəxslərə sənədlərlə bağlı müvafiq prosedur və attestasiya üzrə proqram barədə metodiki yardım göstərilib.

Sonda tədbir iştirakçıları sual və təkliflərini bildiriblər.