Heydər Ələddinoğlu: “30 il ədəbi aləmdə külüng çaldım.Tanınmış şair adını qazansam da, sən demə məşhurlaşacağım sahə ayrı olacaqmış...”
Bu fikri istedadlı şair, əziz qardaşım, dəyərli insan Heydər Ələddinoğlu keçən həftə feysbuk səhifəsində paylaşmışdı. Onu yaxşı anlayıram; ədəbiyyat səltənətindən nəsə ummağa haqqı var. Çünki o, ötəri poeziya marağı olanlardan, bu sahədə kiminsə yerini dar edənlərdən deyil. O, tək-tək şairlərdəndir ki, özünü yazır, özünü ifadə edir, təqlidçilik ona yaddır, ümumiyyətlə, o, özünü şeir yazmağa məcbur etmir, şeiri ona Allah əta edir.
Hələ heç kim (hətta özü də) qərar verə bilməz ki, Heydər Ələddinoğlu şeirdən yarımadı, şeir onun üçün qurtardı, daha onun üçün ədəbiyyat səltənətinin işıqları sönüb və s. Bütün ixtiyarlar Allahın əlindədir. Bilmək olmaz, bir müddət sonra Allah Heydər Ələddinoğlu üçün hansı yolları açacaq...
Bəlli ki, əziz, dəyərli qardaşımız Heydər xeyli vaxtdır (və hazırda da) ədəbiyyatı rəzil günə qoyanlardan, həqiqi söz fatehlərinin haqqını kimlərəsə yedirənlərdən narazıdır (çünki o, özü də dəfələrlə haqsızlığa uğrayanlardandır). Bu səbəbdən (əslində isə dolanışıq səbəbindən) Heydər Ələddinoğlu xeyli müddətdir gələcəyimizin söykənəcək yeri olan yeniyetmə və gənclərə ingilis dili öyrədir. Bu bacarıq onun Allahdan ikinci mükafatıdır. Bu, həm də o anlama gəlir ki, Heydər Ələddinoğlu Allahın nəzərindədir, Allah onu poeziya göydələnindən çıxarmayıb, sadəcə, onun bu sahədə yetişəcəyi uğur öz vaxtını-vədəsini gözləyir. O, bolluca səbr etməli, təmkinlə Allahın ona qapı (və ya qapılar) açacağı günü gözləməlidir. Belə deyək, “Allah verirsə, nemətdir, vermirsə, hikmətdir”.
Heydər Ələddinoğlu, əziz qardaşım, sən həqiqi mənada istedadlı şair, cəmiyyət üçün hədsiz yararlı kadr-mütəxəssis, Allah üçün etiqad, inam və imanda təcəlla edən şəxsiyyətsən. Abrın, həyan, mədəniyyətin həyat örnəkləridir. Çöhrəndəki xoş təbəssüm, insan surətindəki həlimlik və kübarlıq gendən gəlir, bu, sənin nə qədər saf, təmiz və əsilzadə bir insan olduğunun sübutudur. Sənə, sadəcə, bir qardaş tövsiyəm var; biz eyni əhvalda, eyni aqibətdə adamlarıq, əmin ol ki, səni istəməyən çoxdur, o çoxların acığına ədəbiyyat-poeziya qatarından düşmə, çünki bunu Allah istəmir. Sanma ki, Allahın yerinə qərar verirəm, əsla, sadəcə, mən sənin şeiriyyətdə uğur qazanacağına inanıram. Sən də buna inan!Sənə can sağlığı, kəskin ədəbiyyat sevgisi arzu edirəm.