Bolqarıstanın Plovdiv şəhərində keçirilən 23 yaşadək güləşçilərin Avropa çempionatı sona çatmaq üzrədir.

Turaztv.az AZƏRTAC-a istinadən xəbər verir ki, martın 12-də - qitə birinciliyinin altıncı günündə son 4 sərbəst güləşçimiz mübarizəyə qoşulub.

Cəbrayıl Hacıyev (74 kq) ilk mərhələdə erməni Menua Yaribekyana heç bir şans tanımayıb - 12:2. C.Hacıyev dörddəbir finalda avstriyalı Simon Marçl ilə gərgin keçən görüşdən də qalib (4:3) ayrılıb. Güləşçimiz yarımfinalda türkiyəli İsmet Çiftçini üstələyib - 7:3. Təmsilçimiz finalda rumıniyalı Kriştian Büro ilə qarşılaşacaq.

Abubakr Abakarov (86 kq) startda bolqar Xristo İliyevə vaxtından əvvəl qalib gəlib - 10:0. A.Abakarov dörddəbir finalda Fransa təmsilçisi Raxim Maqamedovdan güclü olub - 6:0. Güləşçimiz yarımfinalda 14:2 hesabı ilə türkiyəli Emre Çiftçiyə qalib gəlib. Millimizin üzvü həlledici görüşdə moldovalı Lilian Balanla üz-üzə gələcək.

Millimizin üzvü Abdulcəlil Şabanov (92 kq) ilk görüşdə alban Emiyano Onuziyə vaxtından əvvəl qalib gəlib - 10:0. Ancaq həmyerlimiz dörddəbir finalda gürcü Daviti Koquaşviliyə uduzub - 2:13.

Mübarizəyə dörddəbir finaldan qoşulan Aydın Əhmədov (125 kq) erməni Hovannes Maqakyanı xalçadan məyus yola salıb - 5:1. Pəhləvanımız yarımfinalda gürcü Solomon Manaşviliylə məğlub olub - 5:9. A.Əhmədov bürünc medal uğrunda Yunanıstanı təmsil edən Azamat Xosonovla mübarizə aparacaq.

Medal görüşləri martın 13-də keçiriləcək.