“Sabir Rüstəmxanlı – mütəfəkkir Xalq şairi və istiqlal mübarizi” mövzusunda keçirilən elmi konfransı giriş sözü ilə AMEA-nın prezidenti, akademik İsa Həbibbəyli açıb.
Daha sonra AMEA-nın Fəlsəfə və Sosiologiya İnstitutunun direktoru, professor İlham Məmmədzadə və AMEA-nın Nəsimi adına Dilçilik İnstitutunun direktoru, professor Nadir Məmmədli Xalq şairi ilə bağlı təbrik sözləri söyləyiblər.
Elmi konfrans məruzələrlə davam edib. Fəlsəfə və Sosiologiya İnstitutunun direktor müavini Eynulla Mədətli “Sabir Rüstəmxanlı yaradıcılığında tarixi Azərbaycan və milli məsələ”, fəlsəfə elmləri doktoru Mətanət Şəkixanova “Sabir Rüstəmxanlının ‘Ömür kitabı’ – milli ruhun və kimliyin oyanış düsturu” mövzularında çıxış edərək Xalq şairinin yaradıcılığında milli kimlik, milli ruh, tarix və istiqlal məsələlərinin həlli haqqında fikirlərini bildiriblər.
Daha sonra professor Salidə Şərifova “Sabir Rüstəmxanlı romanlarında mifoloji və fantastik amillərin əksi” mövzusunda çıxış edib, fəlsəfə elmləri doktoru, Vətən müharibəsi veteranı Radif Mustafayev isə şairin “Qarabağa dönüş” poemasındakı məchul qəhrəman obrazını təhlil edib.
Professor İlham Tahirov Sabir Rüstəmxanlı yaradıcılığının dil xəritəsi, leksikoloji zənginliyi haqqında ətraflı məlumat verib, şairin dilinin dilçiliyimizdə ilk müəllif korpusu nümunəsi olduğunu diqqətə çatdırıb.
Fəlsəfə üzrə fəlsəfə doktoru, dosent Faiq Ələkbərli Sabir Rüstəmxanlının Türk dünyasındakı mövqeyindən, Türk birliyi uğrunda mübarizəsindən danışıb.
Şairə Asya Əhmədova çıxışında Sabir Rüstəmxanlı poeziyasında Qarabağ mövzusu, işğala qarşı mübarizə və Xocalı faciəsi haqqında fikirlərini bildirib.
Sonda Sabir Rüstəmxanlı çıxış edərək tədbirin təşkilatçılarına və məruzəçilərə təşəkkürünü bildirib.